କେମିକାଲ ଯୁଗରେ ବଢିଛି ପ୍ରାକୃତିକ ପଦାର୍ଥର ଆଦର

ରାଉରକେଲା: କେମିକାଲ ଯୁଗରେ ବଢୁଛି ପ୍ରାକୃତିକ ପଦାର୍ଥର ଆଦର। ଏଲୋପ୍ୟାଥି ଛାଡ଼ି ଚେରମୂଳି ମୁହାଁ ହେଉଛନ୍ତି ଲୋକ। କରୋନା ପରେ ବଢିଛି ଆୟୁର୍ବେଦର ଚାହିଦା । ଏହାକୁ ନଜରରେ ରଖି ରାଉରକେଲା ସହରର ଭଞ୍ଜ ଭଵନ ପ୍ରଦର୍ଶନୀ ପଡ଼ିଆରେ ଅନୁଷ୍ଠିତ ହୋଇଛି ଆଞ୍ଚଳିକ କଳିଙ୍ଗ ହର୍ବାଲ ମେଳା। ଜାନୁଆରୀ ୪ ତାରିଖ ଠାରୁ ଜାନୁଆରୀ ୮ ତାରିଖ ପର୍ଯ୍ୟନ୍ତ ଅନୁଷ୍ଠିତ ଏହି ମେଳାରେ ୮୫ ଟି ଷ୍ଟଲ ଖୋଲା ଯାଇଛି। ରାଜ୍ୟର ବିଭିନ୍ନ ଜିଲ୍ଲାର ବୈଦ୍ୟମାନେ ଯୋଗ ଦେଇ ୫୩ ଟି ଷ୍ଟଲରେ ଵିଭିନ୍ନ ପ୍ରକାରର ଚେରମୂଳିରୁ ତିଆରି ଔଷଧର ବିକ୍ରୀ କରିବା ସହ ପ୍ରଦର୍ଶନ କରୁଛନ୍ତି। ମିଲେଟ ମିଶନକୁ ପ୍ରୋତ୍ସାହନ ଯୋଗାଇ ଦେଵା ସହ ଚେରମୂଳିରୁ ତିଆରି ଔଷଧର ପ୍ରଚାର ପ୍ରସାର କରିବା ପାଇଁ ଆଞ୍ଚଳିକ କଳିଙ୍ଗ ହର୍ବାଲ ମେଳା ଆୟୋଜନ କରାଯାଇଥିଵା ବନ ବିଭାଗ ପକ୍ଷରୁ କୁହାଯାଇଛି। ମେଳାରେ ନକ୍ଷତ୍ର ବନ ଓ ହର୍ବାଲ ଗାର୍ଡେନ ନିର୍ମାଣ କରାଯାଇଛି।

ରାଉରକେଲା ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ଓ ଓଡିଶା ସରକାରଙ୍କ ରାଜ୍ଯ ଔଷଧୀୟ ବୃକ୍ଷ ପରିଷଦର ମିଳିତ ସହଯୋଗରେ ଆୟୋଜିତ ହୋଇଛି ମେଳା। ମେଳାରେ ସ୍ଵୟଂ ସହାୟକ ଗୋଷ୍ଠୀର ସଦସ୍ୟମାନେ ନିଜ ହାତ ତିଆରି ଵିଭିନ୍ନ ସାମଗ୍ରୀ ବିକ୍ରୀ କରୁଛନ୍ତି। ବୈଦ୍ୟମାନେ ଯୋଗ ଦେଇ ଲୋକଙ୍କ ରୋଗ ପରୀକ୍ଷା କରିବା ସହ ଔଷଧ ବିକ୍ରୀ ଓ ପ୍ରଦର୍ଶନ କରୁଛନ୍ତି।