ସମ୍ପତି ଲୋଭରେ ସ୍ତ୍ରୀ,ପୁଅ ଓ ଶାଳୀକୁ ଗୁଳିମାଡ ; ଅଭିଯୁକ୍ତ ଗିରଫ

ଢେଙ୍କାନାଳ: ସମ୍ପତି ଲୋଭରେ ଉନ୍ମତ୍ତକାଣ୍ଡ । କିଛି ସମ୍ପତ୍ତି ପାଇଁ ଭୁଲିଗଲେ ସମ୍ପର୍କ । ଘରର ମୁରବୀ ପରିବାରର ମେରୁଦଣ୍ଡ ହୋଇଥିବା ବେଳେ ପରିବାରକୁ ମରଣାନ୍ତକ ଆକ୍ରମଣ କରି ମୁରବୀ ଶବ୍ଦକୁ କଳଙ୍କିତ କରିଛନ୍ତି ମାୟାଧର ବେହେରା । ସମ୍ପତ୍ତି ଲୋଭରେ ନିଜ ପତ୍ନୀ, ପୁଅ, ଶାଳୀକୁ ଗୁଳିମାଡ଼ ଆକ୍ରମଣ କରିଛି ଗୃହକର୍ତ୍ତା । ଏଭଳି ଅଭାବନୀୟ ଘଟଣା ଘଟିଛି ଢେଙ୍କାନାଳ ଜିଲ୍ଲା ସଦର ଥାନା ଗୋବିନ୍ଦପୁର ଫାଣ୍ଡି ତାଳବରକୋଟ ଗାଁରେ । ସମ୍ପତ୍ତି ଲୋଭରେ ନିଜ ପତ୍ନୀ, ପୁଅ, ଶାଳୀକୁ ଗୁଳିମାଡ଼ ପରେ କାତିରେ ଆକ୍ରମଣ କରିଛି ଗୃହକର୍ତ୍ତା। ଗୁରୁତର ୩ ଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି।

ଅଭିଯୁକ୍ତ ମାୟାଧର ବେହେରା ଏକ ଦେଶୀ ବନ୍ଧୁକରେ ନିଜ ପତ୍ନୀ କୈକେଇ ବେହେରା, ପୁଅ ବାନା ବେହେରା ଓ ଶାଳୀ ଶୁଭଦ୍ରା ବେହେରାଙ୍କୁ ପ୍ରଥମେ ଗୁଳିମାଡ କରି ପରେ କାତିରେ ଆକ୍ରମଣ କରିଛି। ଗୁରୁତରଙ୍କୁ ପ୍ରଥମେ ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟ ଓ ପରେ କଟକ ସ୍ଥାନାନ୍ତର କରାଯାଇଛି। ଖବରପାଇ ଗୋବିନ୍ଦପୁର ଫାଣ୍ଡି ପୋଲିସ କଟକ ଯାଇ ପଚରାଉଚରା କରିବା ସହିତ ଘଟଣାସ୍ଥଳରେ ପହଁଚି ତଦନ୍ତ କରୁଛି । ଅଭିଯୁକ୍ତ ମାୟାଧରକୁ ଗିରଫ କରିବା ସହିତ ତାଠାରୁ ଦେଶୀ ବନ୍ଧୁକ ଓ କାତିକୁ ଜବତ କରିଛି ପୋଲିସ । ଘଟଣାରେ ଆଉ କାହାର ସଂପୃକ୍ତ ରହିଛି କି ନାହିଁ ସେନେଇ ତଦନ୍ତ ଚାଲିଛି। ମାୟାଧର ପାଖରେ ବନ୍ଧୁକ କେଉଁଠୁ ଆସିଲା ସେ ନେଇ ଖୋଳତାଡ଼ କରୁଛି ପୋଲିସ ।