ଗ୍ରେଟର ନୋଏଡ଼ାରେ ରାହୁଲ, ପ୍ରିୟଙ୍କା ଗାନ୍ଧିଙ୍କ ସମେତ କଂଗ୍ରେସର ୨୦୩ ନେତାଙ୍କ ବିରୋଧରେ ଏତଲା
1 min read
ନୂଆଦିଲ୍ଲୀ: ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଓ ମହାସଚିବ ପ୍ରିୟଙ୍କା ଗାନ୍ଧିଙ୍କ ବିରୋଧରେ ଗ୍ରେଟର ନୋଏଡାର ଇକୋଟେକ୍ ୱାନ୍ ପୋଲିସ ଥାନାରେ ଏଫଆଇଆର୍ ରୁଜୁ ହୋଇଛି । ପୋଲିସ ରାହୁଲ ଓ ପ୍ରିୟଙ୍କାଙ୍କ ସମେତ ୨୦୩ ଜଣ କଂଗ୍ରେସ ନେତାଙ୍କ ବିରୋଧରେ ରୁଜୁ କରିଛି FIR । ଏତଲାରେ ସଙ୍ଗୀନ ଧାରା ସବୁ ଲାଗିଛି । ଗୌତମବୁଦ୍ଧନଗର ପୋଲିସ ପକ୍ଷରୁ ରୁଜୁ ହୋଇଛି ମାମଲା ।
ଏନେଇ ପୋଲିସ କହିଛି- ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧି ପ୍ରାୟ ୨୦୦ କାର୍ଯ୍ୟକର୍ତ୍ତାଙ୍କ ସହିତ ହାଥରସ୍ ଯିବା ପାଇଁ ଡିଏନଡି ରାସ୍ତାରେ ନୋଏଡାରେ ପ୍ରବେଶ କରିଥିଲେ । ଯେଉଁଛିରେ ପ୍ରାୟ ୫୦ ଗାଡ଼ି ଥିଲା । ୧୪୪ ଧାରା ଲାଗୁ ସତ୍ତ୍ୱେ କୋଭିଡ୍ ସ୍ଥିତି ଜଣାଇବା ପରେ ଆଗକୁ ନଯିବା ପାଇଁ ଅନୁରୋଧ କରାଯାଇଥିଲା । ତେବେ, କେହି ନମାନି ସମସ୍ତ ଗାଡ଼ି ଯାତାୟାତ ନିୟମ ଉଲ୍ଲଂଘନ କରି ସାଧାରଣ ଯାତାୟାତ ଉପରେ ବାଧା ସୃଷ୍ଟି କରିଥିଲେ । ଫଳରେ ଯମୁନା ଏକ୍ସପ୍ରେସ୍ ଜାମ୍ ହୋଇ ଯାଇଥିଲା ।
ଯମୁନା ଏକ୍ସପ୍ରେସରେ ୨ଟି ଗାଡ଼ି ନିକଟରେ ବେଶ୍ ଭିଡ଼ ଜମିଥିଲା ପୋଲିସ କହିଛି । ଯାହା ପରେ ଯମୁନା ଏକ୍ସପ୍ରେସର ଜିରୋ ପଏଣ୍ଟରେ ଗାଡ଼ିକୁ ଅଟକାଇବା ବେଳେ ପୋଲିସ ସହ ସେମାନେ ମୁହାଁମୁହିଁ ହୋଇଥିଲେ । ରାହୁଲ ଗାନ୍ଧି ଓ ପ୍ରିୟଙ୍କ ଯମୁନା ଏକ୍ସପ୍ରେସରେ କାର୍ଯ୍ୟକର୍ତ୍ତାଙ୍କ ପାଦରେ ଚାଲି ଚାଲି ଆଗକୁ ବଢ଼ିଥିଲେ । ଫଳରେ ରାସ୍ତାର ଉଭୟ ପାର୍ଶ୍ୱ ଜାମ୍ ହୋଇ ଯାଇଥିଲା । ଭିଡ଼ରେ ଆମ୍ବୁଲାନ୍ସ ମଧ୍ୟ ଫସି ଯାଇଥିଲା ।
୧୪୪ ଧାରା ଲାଗିଥିବାରୁ ଅନୁମତି ବିନା ଏତେ ସଂଖ୍ୟକ ଲୋକ ଏକ୍ସପ୍ରେସକୁ ଜବରଦସ୍ତ ଭାବେ ଯିବାକୁ ଚେଷ୍ଟ କରିଥିଲେ । ୧୪୪ ଧାରା ଉଲ୍ଲଂଘନ ନେଇ ଅବଗତ କରାଇଥିଲେ ବି ଶୁଣିନଥିଲେ । ଆଇନ୍ ଶୃଙ୍ଖଳା ସ୍ଥିତି ବିଗିଡ଼ିବା ନେଇ କହିବା ପରେ ବି କିଛି ପ୍ରଭାବ ପଡ଼ିନଥିଲା ବୋଲି ପୋଲିସ କହିଛି । ରାହୁଲ ଗାନ୍ଧି, ପ୍ରିୟଙ୍କା ଗାନ୍ଧିଙ୍କ ସମେତ ୨୦୩ ଜଣଙ୍କ ବିରୋଧରେ ଏଫଆଇଆର୍ ରୁଜୁ କରାଯାଇଛି ।
ହାଥରସ୍ ପୀଡ଼ିତାଙ୍କ ପରିବାରକୁ ଭେଟିବା ପାଇଁ ରାହୁଲ ଓ ପ୍ରିୟଙ୍କା ଦିଲ୍ଲୀରୁ ବାହାରିଥିଲେ । ଗ୍ରେଟର ନୋଏଡ଼ା ଏକ୍ସପ୍ରେସରେ ପୋଲିସ ସେମାନଙ୍କୁ ଅଟକାଇ ଥିଲା । ପୋଲିସ ଉଭୟଙ୍କୁ ଅଟକ ରଖିବା ପରେ ଛାଡ଼ି ଦେଇଥିଲା । ତାପରେ ରାହୁଲ ଓ ପ୍ରିୟଙ୍କା ଦିଲ୍ଲୀ ପ୍ରତ୍ୟାବର୍ତ୍ତନ କରିଥିଲେ ।
