ଲାଞ୍ଚ ନେଇ ଭିଜିଲାନ୍ସ ହାତରେ ଧରା ପଡ଼ିଲେ ବିଦ୍ୟୁତ ବିଭାଗ କନିଷ୍ଠ ଯନ୍ତ୍ରୀ

ଯାଜପୁର: ବଡଚଣା ବିଦ୍ୟୁତ ବିଭାଗ ଜେଇ ସ୍ୱାଧୀନ କୁମାର ସାହୁ ୧୦ ହଜାର ଟଙ୍କା ଲାଞ୍ଚ ନେଇ ଭିଜିଲାନ୍ସ ହାତରେ ଗିରଫ ହୋଇଛନ୍ତି । ଏ ନେଇ ଭିଜିଲାନ୍ସ ପକ୍ଷରୁ ସୋମବାର ଗଣମାଧ୍ୟମକୁ ଅବଗତ କରାଯାଇଛି । ସ୍ଥାନୀୟ ସୁଙ୍ଗୁଡ଼ା ଅଞ୍ଚଳର ଚିତ୍ତରଞ୍ଜନ ନାୟକଙ୍କ ଘର ପାଖରେ ଥିବା 11 କେଭି ବିଦ୍ୟୁତ ଲାଇନ ସ୍ଥାନାନ୍ତର ପାଇଁ ବିଭାଗୀୟ କର୍ତ୍ତୃପକ୍ଷଙ୍କ ଠାରେ ଅଭିଯୋଗ କରିଥିଲେ। ଏହି କାର୍ଯ୍ୟ କରିବା ପାଇଁ ସ୍ୱାଧୀନ ୧୦ ହଜାର ଟଙ୍କା ଲାଞ୍ଚ ମାଗିଥିଲେ । କୌଣସି ମତେ ଏସମ୍ପର୍କରେ ସୂଚନା ପାଇ ଭିଜିଲାନ୍ସ ଟିମ ପକ୍ଷରୁ ଧରପଗଡ଼ କରାଗଲା । ଜେଇ ଲାଞ୍ଚ ମାଗିବା ନେଇ ଚିତ୍ତରଂଜନ ଆଗତୁରା ଭିଜିଲାନ୍ସ ସହ ଯୋଗାଯୋଗ କରିସାରିଥିଲେ । ଯାହା ଦ୍ୱାରା ଲାଞ୍ଚ ନେବା ଅବସ୍ଥାରେ ତାଙ୍କୁ ଗିରଫ କରାଯାଇଥିଲା ।

ସାଧାରଣ ଜନତାଙ୍କୁ ସବୁ ପ୍ରକାର ସେବା ଯୋଗାଇ ଦେବା ଅଧିକାରୀମାନଙ୍କ ପ୍ରାଥମିକ ଦାୟିତ୍ୱ । ଏଥିପାଇଁ ଲାଞ୍ଚ ମାଗିବା ଏକ ଧର୍ତ୍ତବ୍ୟ ଅପରାଧ । ଦୁର୍ନୀତି, ଲାଞ୍ଚକୁ ନେଇ ରାଜ୍ୟ ସରକାର ସବୁ ସମୟରେ କଡ଼ା ଆଭିମୁଖ୍ୟ ପୋଷଣ କରିଆସିଛନ୍ତି । ଗତବର୍ଷ ଆରମ୍ଭ ହୋଇଥିବା ମୋ ସରକାର କାର୍ଯ୍ୟକ୍ରମ ମଧ୍ୟ ଦୁର୍ନୀତିକୁ ହ୍ରାସ କରିବାରେ ବିଶେଷ ସହାୟକ ହୋଇ ପାରିଛି ।