ବିଦେଶରୁ ଆସିଲେ ବି ଫେରି ପାରିବେନି ଘରକୁ, ସରକାର ଜାରି କଲେ କଟକଣା
ନୂଆଦିଲ୍ଲୀ: ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି କେନ୍ଦ୍ର ସରକାରଙ୍କ ନିଦ ହଜାଇ ଦେଇଛି । କରୋନାକୁ କାବୁ କରିବାକୁ ପନ୍ଥା ଆପଣାଇଛନ୍ତି ସରକାର । ଜାରି ହୋଇଛି ନୂଆ ନିର୍ଦ୍ଦେଶନାମା । ପୂର୍ବରୁ ବିଦେଶରୁ ଆସୁଥିବା ସମସ୍ତ ଯାତ୍ରୀଙ୍କୁ ବିମାନବନ୍ଦରରେ ସ୍କ୍ରିନିଂ କରାଯିବା ସହ ହୋମ୍ କ୍ୱାରେଣ୍ଟାଇନରେ ରଖାଯାଉଥିଲା । ତେବେ, ମଙ୍ଗଳବାର ସୁଦ୍ଧା ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୫୬କୁ ବୃଦ୍ଧି ପାଇବା ଓ ପୁନେରେ ୪ ଓ କେରଳରେ ୩ଟି ନୂଆ ମାମଲା ଚିହ୍ନଟ ପରେ ଚିନ୍ତା ବଢ଼ିଛି ।
ସରକାର ବିଦେଶରୁ ଆସୁଥିବା ଯାତ୍ରୀଙ୍କୁ ପହଞ୍ଚିବା ଠାରୁ ୧୪ ଦିନ ଯାଏଁ କ୍ୱାରେଣ୍ଟାଇନରେ ରଖିବାକୁ ନିଷ୍ପତ୍ତି ନେଇଛନ୍ତି । ଚୀନ, ହଂକଂ, ଦକ୍ଷିଣ କୋରିଆ, ଜାପାନ, ଇଟାଲ, ଥାଇଲାଣ୍ଡ, ସିଙ୍ଗାପୁର, ଇରାନ, ମାଲେସିଆ, ସ୍ପେନ୍ ଓ ଜର୍ମାନୀରୁ ଆସୁଥିବା ଯାତ୍ରୀଙ୍କ କ୍ଷେତ୍ରରେ ଏହି ନିଷ୍ପତ୍ତି କାର୍ଯ୍ୟକାରୀ ହେବ । ଏନେଇ କେନ୍ଦ୍ର ସରକାର ସୂଚନା ଦେଇଛନ୍ତି ।
ଯଦି କେହି ବି ଯାତ୍ରୀ ଏସବୁ ଦେଶରୁ ସିଧାସଳଖ ଆସୁନଥାନ୍ତି । କିନ୍ତୁ, ଆସିବା ପୂର୍ବରୁ ଏହି ୧୨ଟି ଦେଶରୁ କୌଣସ ଦେଶକୁ ଯାଇଥିଲେ ତାଙ୍କୁ ମଧ୍ୟ ମାସ୍ କ୍ୱାରେଣ୍ଟାଇନରେ ରଖାଯିବା ନେଇ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ଏହା ଭାରତୀୟଙ୍କ ସମେତ ବିଦେଶୀ ନାଗରିକଙ୍କ କ୍ଷେତ୍ରରେ ଲାଗୁ ହେବ । ଉପରୋକ୍ତ ୧୨ଟି ଦେଶର ନାଗରିକଙ୍କୁ ଭାରତରେ ପ୍ରବେଶ ପାଇଁ ଅନୁମତି ଦିଆଯିବ ନାହିଁ ।
