ଶସ୍ତା ହେବ ସୁନା ଓ ରୁପା ! ଆମଦାନୀ ଶୁଳ୍କ କମାଇବାକୁ ଯୋଜନା କରୁଛନ୍ତି ସରକାର
ନନ୍ଦିଘୋଷ ବ୍ୟୁରୋ: ସରକାରୀ ଯେଉଁ ଉଦ୍ଦେଶ୍ୟରେ ସୁନା ଓ ରୁପା ଉପରେ ଆମଦାନୀ ଶୁଳ୍କ ବଢ଼ାଇତିଲେ ତାହା ବିଫଳ ହୋଇଯାଇଛି । ଆମଦାନୀ ଉପରେ ରୋକ ଲଗାଇବାକୁ ଡ୍ୟୁଟି ବଢ଼ାଯିବା ପରେ ବି ଦେଶରେ ସୁନାର ଚାହିଦାରେ ବିଶେଷ ହ୍ରାସ ଘଟି ନଥିଲା । ଅନ୍ୟପକ୍ଷେ ଏହାର ବିପରୀତ, ଅସାଧୁ ବେପାର ବହୁ ମାତ୍ରାରେ ବଢ଼ିଯାଇଛି । ଏବେ ଖବର ଆସୁଛି, ସରକାର ସୁନା ଓ ରୁପା ଉପରୁ ଆମଦାନୀ ଶୁଳ୍କ କମାଇବାକୁ ଗମ୍ଭୀରତାର ସହ ବିଚାର କରୁଛନ୍ତି । ଜେମ୍ସ ଆଣ୍ଡ ଜୁଏଲରୀ କାଉନସିଲ ଚେୟାରମ୍ୟାନ ରାଜେଶ ରୋକଡେ ଏକ ସାକ୍ଷାତକାରରେ କହିଛନ୍ତି, ଅତ୍ୟଧିକ ଟ୍ୟାକ୍ସ ଲଗାଯିବାର ଉଦ୍ଦେଶ୍ୟ ବିଫଳ ହୋଇଛି । ଏହାପରେ ସରକାର ଏହି ନୀତି ଉପରେ ବିଚାର କରୁଛନ୍ତି ।
ଇକୋନୋମିକ୍ସ ଟାଇମ୍ସର ଏକ ରିପୋର୍ଟ ଅନୁସାରେ, ସରକାର ସୁନା ଉପରେ ଆମଦାନୀ ଶୁଳ୍କ ବଢ଼ାଇବା ବେଳେ ଜୁଏଲରୀ ବଡି ଚେତାବନୀ ଦେଇ କହିଥିଲା, ଅତ୍ୟଧିକ ଟ୍ୟାକ୍ସ କାରଣରୁ ଅସାଧୁ ବ୍ୟବସାୟକୁ ଗତି ମିଳିବ । ରୋକଡେଙ୍କ ଅନୁସାରେ, ଏମିତି ହିଁ ହେଲା । ସରକାର ଆଶା କରୁଥିଲେ ଟ୍ୟାକ୍ସ ବଢ଼ାଇଲେ ସୁନା ଆମଦାନୀ କମିବ, ହେଲେ ଏମିତି ହେଲା ନାହିଁ । ଆମଦାନୀ ତ କମିଲା ନାହିଁ, ହେଲେ ଗ୍ରେ ମାର୍କେଟର ପରିଧି ଦ୍ରୁତଗତିରେ ବଢ଼ିଗଲା । ଲୋକେମାନେ ଟ୍ୟାକ୍ସ ବଞ୍ଚାଇବା ପାଇଁ ଅସାଧୁ ରାସ୍ତାକୁ ଆପଣାଇବାକୁ ପଛାଇଲେ ନାହିଁ ।
ରୋକଡେଙ୍କ ଅନୁସାରେ, ସରକାର ବହୁତ ସମୟରୁ ଏହା ଉପରେ ବିଚାର କରୁଛନ୍ତି । ବର୍ତ୍ତମାନ ପାଇଁ ଟ୍ୟାକ୍ସ କମାଇବା ଉପରେ ଅନ୍ତିମ ନିଷ୍ପତ୍ତି ନିଆଯାଇନାହିଁ । ହେଲେ ଆଲୋଚନା ଓ ପର୍ଯ୍ୟାଲୋଚନା ଜାରି ରହିଛି । ସରକାର ଏକ ଉଚିତ ସମୟର ଅପେକ୍ଷାରେ ରହିଛନ୍ତି, ଯେତେବେଳେ ଟ୍ୟାକ୍ସ କମାଇବା ନେଇ ଘୋଷଣା କରିପାରନ୍ତି । ମେ’ ମାସରେ କେନ୍ଦ୍ର ସରକାର ସୁନା ଓ ରୁପା ଉପରେ କଷ୍ଟମ ଡ୍ୟୁଟି ୬ ପ୍ରତିଶତରୁ ବଢ଼ାଇ ୧୫ ପ୍ରତିଶତ କରିଦେଇଥିଲେ । ପଶ୍ଚିମ ଏସିଆରେ ଲାଗି ରହିଥିବା ଆଶାନ୍ତି ମଧ୍ୟରେ ଦେଶର ବିଦେଶୀ ମୁଦ୍ରା ଭଣ୍ଡାର ଉପରେ ଚାପ କମାଇବାକୁ ସରକାର ଏମିତି ପଦକ୍ଷେପ ନେଇଥିଲେ ।
ସୂଚନାଯୋଗ୍ୟ, ବିଶ୍ବରେ ଚୀନ ପରେ ଭାରତ ସୁନା ଆମଦାନୀ କରିବାରେ ଦ୍ବିତୀୟ ଦେଶ । ପ୍ରତିବର୍ଷ ଦେଶରେ ପ୍ରାୟ ୭ ଶହରୁ ୯ ଶହ ଟନ ସୁନା ଆମଦାନୀ ହୋଇଥାଏ । ସରକାରୀ ତଥ୍ୟ ଉପରେ ନଜର ପକାଇଲେ ୨୦୨୬ ଆର୍ଥିକ ବର୍ଷ ସୁନା ଆମଦାନୀ ୨୪ ପ୍ରତିଶତ ବଢ଼ି ୭୧.୯ ଲକ୍ଷ କୋଟି ରେକର୍ଡ ସ୍ତରରେ ପହଞ୍ଚି ଯାଇଛି । ହିସାବକୁ ଦେଖିଲେ ଆମଦାନୀ କମି ୭୨୧ ଟନ ହୋଇଯାଇଥିଲା । ହେଲେ ବି ବୋଝ କମ ହୋଇ ନଥିଲା ।
