ଅନାଥ ଝିଅକୁ ସାହାଯ୍ୟ କରିବେ କହି ଭୁଲିଗଲେ ରାଜ୍ୟପାଳ!

ନନ୍ଦିଘୋଷ ବ୍ୟୁରୋ: ବାପ ମାଆ ଛେଉଣ୍ଡ ଅନାଥ ଝିଅକୁ ସାହାଯ୍ୟ କରିବେ କହି ଭୁଲିଗଲେ ରାଜ୍ୟପାଳ l ଦେବଗଡ ବାରକୋଟ ବଳମ ପଞ୍ଚାୟତ ନୂଆଗାଁର ପୂଜା କିଷନଙ୍କୁ ରାଜ୍ଯପାଳ ସହଯୋଗ କରିବାକୁ କହି ଭୁଲି ଯାଇଥିବା ଅଭିଯୋଗ ହୋଇଛି। ବାପା ମାଆଙ୍କୁ ହରାଇଛନ୍ତି ପୂଜା। ପରିବାରରେ କେହି ନଥିବା ବେଳେ ମୁଣ୍ଡରେ ଘାରିଛି ପାଠ ପଢା ଚିନ୍ତା।

ବାପ ମାଆ ଛେଉଣ୍ଡ ଅନାଥ ଝିଅକୁ ସାହାଯ୍ୟ କରିବେ କହି ଭୁଲିଗଲେ  ରାଜ୍ୟପାଳ l ଏଭଳି ଅଭିଯୋଗ ଆସିଛି ଦେବଗଡ ବାରକୋଟ ବଳମ ପଞ୍ଚାୟତ ନୂଆଗାଁରୁ। ଗତ ସାଧାରଣ ନିର୍ବାଚନ ପୂର୍ବରୁ ମାର୍ଚ୍ଚ ୪ ତାରିଖ ଦିନ ମହାମହିମ ରାଜ୍ୟପାଳ ରଘୁବର ଦାସ ଦେବଗଡ଼ ଗସ୍ତ ସମୟରେ ନୂଆଗାଁର ୧୪ବର୍ଷୀୟା ପୂଜା କିଷନଙ୍କୁ ଭେଟିଥିଲେ। ବାପା ମାଆଙ୍କୁ ହରାଇ ପୂଜା ଆର୍ଥିକ ସମସ୍ଯା ଭୋଗୁଥିବା ଜାଣି ୧ ଲକ୍ଷ ଟଙ୍କା ସହାୟତା ଘୋଷଣା କରିଥିଲେ l ସେଠାରେ ଉପସ୍ଥିତ ଜିଲ୍ଲାପାଳ ମଧ୍ୟ ପୂଜାଙ୍କୁ ଶିଶୁ ସୁରକ୍ଷା ବିଭାଗ ମାଧ୍ୟମରେ ପାଠ ପଢା ସହ ଆର୍ଥିକ ସହାୟତା ପାଇଁ ବ୍ୟବସ୍ଥା କରିବେ ବୋଲି ପ୍ରତିଶୃତି ଦେଇଥିଲେ। ବଡ ବଡ ଲୋକଙ୍କ ଠାରୁ ପ୍ରତିଶୃତି ପାଇବା ପରେ ଉଚ୍ଚ ଶିକ୍ଷାର ସ୍ବପ୍ନ ଦେଖୁଥିଲେ ପୂଜା। ହେଲେ ୪ମାସ ବିତିଗଲା ପରେ ମଧ୍ୟ ନା ରାଜ୍ୟପାଳଙ୍କ ଏକଲକ୍ଷ ଟଙ୍କା ସହାୟତା ମିଳିଲା ନା,ଜିଲ୍ଲାପାଳ ଦେଇଥିବା ପ୍ରତିଶୃତି ରଖିଲେ । ଏବେ କେଉଁଠୁ ବି ସହାୟତା ନମିଳିବାରୁ ନିରାଶ ହୋଇପଡିଛନ୍ତି ପୂଜା।

ଏବେ ଆସନ୍ତୁ ଦେଖିବା  ପୂଜାଙ୍କ ଦୁର୍ଭାଗ୍ୟ ।  ବାରକୋଟ ବ୍ଲକ ବଳମ ପଞ୍ଚାୟତ ନୂଆଗାଁର ଶିବ କିଷାନଙ୍କ ଝିଅ ପୂଜା। ୨୦୧୧ରେ ବାପାଙ୍କର ଦେହାନ୍ତ ହୋଇଗଲା। ଶିବଙ୍କ ପତ୍ନୀ ଯାମିନୀ କିଷାନ ମୁଲ ମଜୁରୀ କରି ଦୁଇ କନ୍ୟା ସନ୍ତାନ ଲିଜା ଓ ପୂଜାକୁ ଲାଳନ ପାଳନ କରୁଥିଲେ l ୨୦୨୩ରେ ଯାମିନୀ ମଧ୍ୟ ଆଖି ବୁଜିଥିଲେ l ବଡ ଭଉଣୀ ଲିଜାର ବିବାହ ସରିଛି। ସାନ ଝିଅ ପୂଜା ବାପା ମାଆଙ୍କୁ ହରାଇବା ପରେ ଘରେ ଏକୁଟିଆ ରହୁଛନ୍ତି। ଆଗକୁ କେମିତି ପଢା ଖର୍ଚ୍ଚ ବହନ କରିବେ ସେଇ ଚିନ୍ତା। ତେବେ ରାଜ୍ଯପାଳଙ୍କ ସହାୟତା ଲୋଭରେ ପୂଜା ଉଚ୍ଚ ଶିକ୍ଷା ପାଇବା ସ୍ବପ୍ନ ଦେଖିସାରିଥିବା ବେଳେ ଏବେ ସହାୟତା ନମିଳିବାରୁ କଣ କରିବେ ତାକ ନେଇ ଚିନ୍ତାରେ । ସେପଟେ ରାଜ୍ୟପାଳ ଓ ଜିଲ୍ଲାପାଳ ପ୍ରତିଶୃତି ଦେଇ ପୂଜାଙ୍କୁ ଭୁଲି ଦେଇଥିବାରୁ ସ୍ଥାନୀୟ ଲୋକ ଅସନ୍ତୋଷ ବ୍ୟକ୍ତ କରିଛନ୍ତି ।