କ୍ଷତିଗ୍ରସ୍ତ ଶିଳ୍ପକୁ ଟ୍ରାକକୁ ଫେରାଇ ଆଣିବା ପାଇଁ ଖୁବଶୀଘ୍ର ଆସିପାରେ ପ୍ୟାକେଜ୍
ଭୁବନେଶ୍ୱର: କରୋନା ମାଡ଼ରେ ଦୁର୍ବଳ ହୋଇଯାଇଥିବା ଶିଳ୍ପକୁ ପୁଣି ଟ୍ରାକକୁ ଫେରାଇବାକୁ ରାଜ୍ୟ ସରକାରଙ୍କ ଉଦ୍ୟମ । ଖୁବଶୀଘ୍ର ଶିଳ୍ପ କ୍ଷେତ୍ର ପାଇଁ ପ୍ୟାକେଜ ଘୋଷଣା କରିପାରନ୍ତି ସରକାର । ଏ ନେଇ ଆଜି ବସିଥିବା ଆନ୍ତଃ ମନ୍ତ୍ରୀସ୍ତରୀୟ ବୈଠକରେ ପ୍ରାଥମିକ ଭାବେ ଆଲୋଚନା ହୋଇଛି । ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥାମାନଙ୍କର କଣ ସମସ୍ୟା ରହିଛି, କଣ ଆବଶ୍ୟକତା ରହିଛି ସରକାରଙ୍କୁ ଜଣାଇବା ପାଇଁ ସମସ୍ତ ଶିଳ୍ପ ଆସୋସିଏସନକୁ କୁହାଯାଇଛି ।
ବିଶେଷକରି ଭିତ୍ତିଭୂମି କ୍ଷେତ୍ରରେ ସରକାର ପୁଞ୍ଜି ନିବେଶ କରିବାକୁ ଚାହୁଁଛନ୍ତି ବୋଲି ଆଜି ବସିଥିବା ବୈଠକରେ ଆଲୋଚନା ହୋଇଛି । ୪ରୁ ୫ଦିନ ମଧ୍ୟରେ ପୁଣି ବୈଠକ ବସି ନିଷ୍ପତ୍ତି ନିଆଯିବ ବୋଲି ସୂଚନା ଦେଇଛନ୍ତି ଅତିରିକ୍ତ ଶିଳ୍ପ ସଚିବ ନୀତିନ ଭାନୁଦାସ ଜାଓ୍ୱଲେ । ଆଜିର ବୈଠକ ଭିଡିଓ କନଫରେସିଂରେ ଅନୁଷ୍ଠିତ ହୋଇଥିଲା । ଅର୍ଥ, ଶିଳ୍ପ, ଶ୍ରମ, ଶକ୍ତି, ଖଣି ବିଭାଗର ମନ୍ତ୍ରୀ ଓ ସଚିବ ମାନେ ବୈଠକରେ ଉପସ୍ଥିତ ଥିଲେ ।
