ନବକିଶୋର ଦାସ ହତ୍ୟା ମାମଲା, ଆଜି ଗୋପାଳର ହେବ ନାର୍କୋ ଟେଷ୍ଟ

ଝାରସୁଗୁଡ଼ା: ନବକିଶୋର ଦାସ ହତ୍ୟା ମାମଲା । ଅଭିଯୁକ୍ତ ଗୋପାଳ କୃଷ୍ଣ ଦାସର ମିଛ ଧରୁଛି କ୍ରାଇମବ୍ରାଞ୍ଚ । ଗୁଜରାଟ ଗାନ୍ଧୀନଗର SFSL ଲ୍ୟାବରେ ଗୋପାଳର ହେଉଛି ମିଛଧରା ପରୀକ୍ଷା । ଗତକାଲି ଗୋପାଳର ପଲିଗ୍ରାଫ ଟେଷ୍ଟ କରାଯାଇଥିବାବେଳେ ଆଜି ନାର୍କୋ ଟେଷ୍ଟ କରାଯିବ । ସ୍ବାସ୍ଥ୍ୟ ପରୀକ୍ଷା ପରେ ଅଭିଯୁକ୍ତର ନାର୍କୋ ଟେଷ୍ଟ ହେବ । ଏଥିପାଇଁ କ୍ରାଇମବ୍ରାଞ୍ଚ ଏଡିଜି ଅରୁଣ ବୋଥ୍ରାଙ୍କ ନେତୃତ୍ବରେ ଏକ ଆଠ ଜଣିଆ ଟିମ୍ ଗୋପାଳକୁ ନେଇ ଗୁଜରାଟ ଯାଇଛି ।

ଏହା ପୂର୍ବରୁ ଝାରସୁଗୁଡ଼ାରେ ଗୋପାଳର LVA ଟେଷ୍ଟ କରାଯାଇଛି। ମନସ୍ତତ୍ୱବିତଙ୍କ ଉପସ୍ଥିତିରେ ସ୍ବତନ୍ତ୍ର ମେଡିକାଲ କମିଟି ଅଭିଯୁକ୍ତର ମାନସିକ ସ୍ଥିତି ଅନୁଧ୍ୟାନ କରିଥିଲା। LVA ଟେଷ୍ଟ ରିପୋର୍ଟକୁ ଅପେକ୍ଷା କରାଯାଇଛି । ଜେରା ବେଳେ ଗୋପାଳ ଦେଇଥିବା ବୟାନ କେତେ ସତ । ତଦନ୍ତକୁ ବିଭ୍ରାନ୍ତ କରିବାକୁ ଚେଷ୍ଟା କରିନି ତ ଅଭିଯୁକ୍ତ । ମିଛ କହି ମାମଲାକୁ ନୂଆ ମୋଡ଼ ଦେଇନି ତ । ନାର୍କୋ ଟେଷ୍ଟ ମାଧ୍ୟରେ ଗୋପାଳଠୁ ସତ ଆଦାୟ କରିବ କ୍ରାଇମବ୍ରାଞ୍ଚ । ଗତକାଲିଠୁ ଗୋପାଳ ତୃତୀୟ ପର୍ଯ୍ୟାୟ ରିମାଣ୍ଡ ଆରମ୍ଭ ହୋଇଛି ।