ଅସ୍ଥାୟୀ ସ୍ୱାସ୍ଥ୍ୟ ଶିବିରରେ ପ୍ରବାସୀ ଓଡ଼ିଆ ଶିଶୁ କନ୍ୟାର ମୃତ୍ୟୁ, ମୃତ୍ୟୁର କାରଣ ଅସ୍ପଷ୍ଟ

ନୂଆପଡ଼ା: ଅସ୍ଥାୟୀ ସ୍ୱାସ୍ଥ୍ୟ ଶିବିରରେ ଶିଶୁ ମୃତ । ନୂଆପଡ଼ା ଖଡ଼ିଆଳ ଚଲାନପଡ଼ାରେ ଥିବା ଟିଏମସିରେ ୬ବର୍ଷର ଶିଶୁ କନ୍ୟାର ମୃତ୍ୟୁ ହୋଇଛି । ଝିଅର ମୃତ୍ୟୁ ନେଇ ପରିବାରରେ ଶୋକାକୂଳ ପରିବେଶ ସୃଷ୍ଟି ହୋଇଛି । ସେପଟେ କେଉଁ କାରଣରୁ ମୃତ୍ୟୁ ହୋଇଛି ତାହା ଏପର୍ଯ୍ୟନ୍ତ ଜଣାପଡ଼ିନାହିଁ ।

ସୂଚନା ଅନୁଯାୟୀ,  ପ୍ରବାସୀ ଓଡ଼ିଆ ଶ୍ରମିକ ପରିବାର ୫ ତାରିଖରେ ଖଡ଼ିଆଳରେ ପହଞ୍ଚିଥିଲେ । ଏହି ପରିବାର ହେଉଛନ୍ତି ଖଡ଼ିଆଳ ବ୍ଲକର ଝୋଲପଥର ଗାଁର କଲସାଏଙ୍କ ପରିବାର । ତାଙ୍କ ପରିବାରର ୫ ଜଣ ସଦସ୍ୟ ସ୍ୱାମୀ, ସ୍ତ୍ରୀ ଏବଂ ୩ ଶିଶୁ ରହିଥିଲେ  । ଫେରିବା ପରେ ୫ ଜଣଙ୍କୁ ଚାଲାନପଡ଼ା ଗାଁ ଅସ୍ଥାୟୀ ସ୍ୱାସ୍ଥ୍ୟକେନ୍ଦ୍ରରେ ରଖାଯାଇଥିଲା । ରାତିରେ ୬ ବର୍ଷୀୟ ଝିଅ ବର୍ଷାର ଦେହ ଅସୁସ୍ଥ ହେବାରୁ ସରପଞ୍ଚଙ୍କୁ ଜଣାଯାଇଥିଲା ।

ଡାକ୍ତର ଆସି ଚିକିତ୍ସା କରିବା ସହ ମେଡିସିନ୍‌ ଦେଇଥିଲେ । ହେଲେ ଭୋରରୁ ଝିଅ ବର୍ଷାର ମୃତ୍ୟୁ ହୋଇଛି । ଝିଅର ମୃତ୍ୟୁ ପରେ ପରିବାରରେ ଶୋକାକୂଳ ପରିବେଶ ସୃଷ୍ଟି ହୋଇଛି । ଘଟଣା ସ୍ଥଳରେ ବିଡିଓ ଏବଂ ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ବେଳେ ଡାକ୍ତରୀ ଦଳ ପହଞ୍ଚି ମୃତ ଶିଶୁର ସ୍ୱାବ ସଂଗ୍ରହ କରିଛନ୍ତି ।