କମ୍ପିବ କଳିଙ୍ଗ, ଆରମ୍ଭ ହେବ FIH ପୁରୁଷ ହକି ପ୍ରୋ ଲିଗ୍

ଭୁବନେଶ୍ୱର: ଶୁକ୍ରବାର ଠାରୁ କମ୍ପିବ କଳିଙ୍ଗ । ଆରମ୍ଭ ହେବ FIH ପୁରୁଷ ହକି ପ୍ରୋ ଲିଗ୍ ମ୍ୟାଚ୍ । ଓଡିଶା ଦ୍ବାରା ଆୟୋଜିତ ହୋଇଛି FIH ପୁରୁଷ ହକି ପ୍ରୋ ଲିଗର ୪ର୍ଥ ସଂସ୍କରଣ । ଟୁର୍ଣ୍ଣାମେଣ୍ଟରେ ଭାରତ ସମେତ ସ୍ପେନ୍ ଓ ନ୍ୟୁଜିଲାଣ୍ଡ ଭଳି ୩ଟି ଶକ୍ତିଶାଳୀ ଦଳ ଅଂଶଗ୍ରହଣ କରୁଛନ୍ତି । କଳିଙ୍ଗ ଷ୍ଟାଡିୟମରେ ଭାରତ, ସ୍ପେନ ଓ ନ୍ୟୁଜଲାଣ୍ଡ ମଧ୍ୟରେ 6 ଟି ମ୍ୟାଚ ଖେଳାଯିବ । ପ୍ରଥମ ମ୍ୟାଚରେ ନ୍ୟୁଜିଲାଣ୍ଡକୁ ଭେଟିବ ଭାରତ । ପ୍ରଥମ ଥର ଟିମ ଇଣ୍ଡିଆର କ୍ୟାପଟେନ ଭାବେ ମଙ୍ଗଧରିଛନ୍ତି ହରମନପ୍ରୀତ ସିଂ। ମ୍ୟାଚରେ ଦଳ କିଭଳି ଭଲ ପ୍ରଦର୍ଶନ କରିବ ଓ ସମସ୍ତେ କିଭଳି ନିଜର ବେଷ୍ଟ ଦେବେ ତାହାକୁ ଗୁରୁତ୍ବ ଦିଆଯାଇଛି ।

ଏହାସହ ଭୁବନେଶ୍ୱର ଗ୍ରାଉଣ୍ଡ ଆମ ପାଇଁ ସ୍ୱତନ୍ତ୍ର ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ହରମନପ୍ରୀତ । ସେପଟେ ଟିମର ବିଭିନ୍ନ ବିଭାଗ ସନ୍ତୁଳିତ ଓ ଶକ୍ତିଶାଳୀ ଥିବାରୁ ନିଜର ବିଜୟ ନେଇ ଆଶା ରଖିଛି ସ୍ପେନ ଟିମ୍ । ବିଶ୍ବକପ୍ ପୂର୍ବରୁ କଳିଙ୍ଗ ଷ୍ଟାଡିୟମରେ ଖେଳିବାର ସୁଯୋଗ ମିଳିଥିବାରୁ ସ୍ପେନ ଟିମ୍ ଖୁସି ବ୍ୟକ୍ତ କରିଛି । କଳିଙ୍ଗ ଷ୍ଟାଡିୟମର ପଡିଆ ବିଶ୍ବସ୍ତରୀୟ ସହ ପ୍ରସ୍ତୁତିକୁ ନେଇ ସାମ୍ବାଦିକ ସମ୍ମିଳନୀରେ ଓଡିଶାକୁ ପ୍ରଶଂସା କରିଛନ୍ତି ସ୍ପେନ ଦଳର ଉଭୟ କୋଚ ଓ ଅଧିନାୟକ।

ସେପଟେ ନ୍ୟୁଜିଲାଣ୍ଡ ଟିମ୍ ପକ୍ଷରୁ ସାମ୍ବାଦିକ ସମ୍ମିଳନୀ କରି ଓଡ଼ିଶାରେ ଟୁର୍ଣ୍ଣାମେଣ୍ଟ ଆୟୋଜନକୁ ପ୍ରଶଂସା କରାଯାଇଛି । ମ୍ୟାଚରେ ଭଲ ଖେଳିବା ଆମ ପାଇଁ ଚ୍ୟାଲେଞ୍ଜ ରହିବ ବୋଲି କହିଛନ୍ତି ନ୍ୟୁଜିଲାଣ୍ଡ କୋଚ ଓ ଖେଳାଳି । ଟୁର୍ଣ୍ଣାମେଣ୍ଟ ପୂର୍ବରୁ ସମସ୍ତ ଟିମ୍ ଅଭ୍ୟାସ ମ୍ୟାଚ ଖେଳି ନିଜକୁ ପ୍ରସ୍ତୁତ କରିଛନ୍ତି । ୨୦୨୩ ଜାନୁଆରୀରେ ଓଡିଶା ପୁଣି ଆୟୋଜନ କରିବାକୁ ଯାଉଛି ବିଶ୍ବକପ୍ ହକି ।