ପ୍ରେମ ପାଇଁ ଜର୍ମାନୀରୁ ଓଡ଼ିଶା ଆସିଲେ ବିଦେଶିନୀ

ସାେନପୁର: ସେ ବିଦେଶିନୀ। ହେଲେ ନିଜ ଜୀବନ ସାଥୀ ପାଇଁ ସାତ ସମୁଦ୍ର ତେର ନଈ ଡେଇଁ ଜର୍ମାନୀରୁ ଆସିଛନ୍ତି ଓଡ଼ିଶା। ଓଡ଼ିଆ ଘରେ ଓଡ଼ିଆ ଖାଦ୍ୟ ରାନ୍ଧି ପରିବାର ମନ ମୋହୁଛନ୍ତି। ସ୍ବାମୀଙ୍କୁ ମାନି ନେଇଛନ୍ତି ଇହକାଳ ପରକାଳର ଦେବତା। ଏବେ ସେ ତାଙ୍କ ପାଇଁ ସବୁକିଛି। ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକ ସିନ୍ଦୁରପୁର ଗାଁର ମୂକ ବଧିର ‘ଶିବାଜୀ ପଣ୍ଡା’ ଙ୍କୁ ବିବାହ କରିଛନ୍ତି ଜର୍ମାନୀ ଝିଅ ‘ଉଲରିକ୍ ଜେସନ’।

ଉଲରିକ ଜଣେ ସାଙ୍କେତିକ ଭାଷାର ପ୍ରଫେସର। ଶିବାଜୀ ମଧ୍ୟ ଇଂଲଣ୍ଡର ସେଣ୍ଟ୍ରାଲ ଲଙ୍କାସାୟାର ୟୁନିଭର୍ସିଟିରେ ପ୍ରଫେସର ଭାବେ କାମ କରୁଥିଲେ। ଦୀର୍ଘ ୨୦ବର୍ଷ ଧରି ଉଭୟେ ସାଙ୍କେତିକ ଭାଷାରେ ଏକା ସାଙ୍ଗରେ କାମ କରିବା ବେଳେ ପ୍ରେମ ସମ୍ପର୍କ ଗଢିଉଠିଥିଲା। ଏବେ ଓଡ଼ିଶାର ସଂସ୍କୃତି ପରମ୍ପରା, ପରିବେଶ, ଖାଦ୍ୟପେୟରେ ଆକର୍ଷିତ ହୋଇ ଉଭୟ ପରିବାରର ସହମତିରେ ଶିବାଜୀଙ୍କୁ ଲଣ୍ଡନର ଏକ କୋର୍ଟରେ ବିବାହ କରିଥିଲେ ଉଲରିକ୍।  ଏବେ ନିଜ ଜନ୍ମ ମାଟି ଉଲୁଣ୍ଡା ବ୍ଲକ ଲକ୍ଷ୍ମଣପୁର ଗାଁ ନିକଟରେ ଶିବାଜୀ ନିର୍ମାଣ କରିଥିବା ଇକୋଭିଲେଜରେ ଉଭୟେ ରହୁଛନ୍ତି । ଘର କାମଧାମ ସାଙ୍ଗକୁ ହାପିହେଣ୍ଡସ ସ୍କୁଲରେ ଶିକ୍ଷକ ମାନଙ୍କୁ ସାଙ୍କେତିକ ଭାଷାରେ ତାଲିମ ଦେଉଛନ୍ତି ଉଲରିକ୍ ।

ତାଙ୍କର ଏହି ଇକୋଭିଲେଜ ନଦୀ ତଟରେ ରହିଛି। ମନୋରମ ପରିବେଶ ସାଙ୍ଗକୁ ଜଙ୍ଗଲୀ ପରିବେଶ। ଏଠାକୁ ଦେଶ ବିଦେଶରୁ ମଧ୍ୟ ପର୍ଯ୍ୟଟକ ବୁଲିବାକୁ ଆସୁଛନ୍ତି। ଶିବାଜୀଙ୍କ ପଦକ୍ଷେପକୁ ଦେଖି ବହୁ ପ୍ରଶଂସା ମଧ୍ୟ କରୁଛନ୍ତି। ବିଦେଶରେ ପ୍ରଫେସର ଭାବେ କାମ କରୁଥିବା ଶିବାଜୀ ଚାକିରି ଛାଡି ନିଜ ଜନ୍ମ ମାଟିରେ ଚାଷ କରି ସୁନାର ଫସଲ ଫଳାଇପାରୁଛନ୍ତି । ଜୈବିକ ପଦ୍ଧତିରେ ପନିପରିବାଠୁ ଆରମ୍ଭକରି ବିଭିନ୍ନ ପ୍ରକାର ଫଳଗଛ ଲଗାଇଛନ୍ତି। ସେପଟେ ଶିବାଜୀ ଓ ଉଲରିକ ଭାରି ମେଳାପି ବୋଲି କହିଛନ୍ତି ଜଣେ କର୍ମଚାରୀ।