ଅଳିଆ ଗଦାକୁ ନେଇ ଦିଲ୍ଲୀ ରାଜନୀତି ସରଗରମ, ମୁହାଁମୁହିଁ ଆପ୍ ବିଜେପି

ନୂଆଦିଲ୍ଲୀ: ଦିଲ୍ଲୀ ପୌର ନିର୍ବାଚନ ପୂର୍ବରୁ ଅଳିଆ ଗଦାକୁ ନେଇ ରାଜନୀତି ସରଗରମ  ।  ଗାଜିପୁର ଲ୍ୟାଣ୍ଡଫିଲ ସାଇଟରେ ବିଜେପିର ହଙ୍ଗାମା । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଓ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଗାଜିଆବାଦ ଗସ୍ତ କରିଥିବା ବେଳେ ବିକ୍ଷୋଭ ପ୍ରଦର୍ଶନ କରିଛି ଭାରତୀୟ ଜନତା ପାର୍ଟି । ଦିଲ୍ଲୀ ସରକାର ବିରୋଧରେ ନାରାବାଜୀ ସହ କେଜ୍ରିଓ୍ବାଲ ଓ ସିସୋଦିଆଙ୍କ ହାଏ ହାଏ ନାରା ଲଗାଇଥିଲେ ବିଜେପି କର୍ମକର୍ତ୍ତା ।

ବିଜେପି ବିକ୍ଷୋଭକୁ କାଉଣ୍ଟର କରି ଆପ୍ ପକ୍ଷରୁ ଗାଜିପୁର ଲ୍ୟାଣ୍ଡଫିଲ ସାଇଟରେ ବିକ୍ଷୋଭ ପ୍ରଦର୍ଶନ କରାଯାଇଛି । ବିକ୍ଷୋଭ ସ୍ଥଳରେ ମୁହାଁମୁହିଁ ହୋଇଛନ୍ତି ଆପ୍-ବିଜେପି କର୍ମୀ । ସଫେଇ ପାଇଁ ଆସୁଥିବା ଫଣ୍ଡ ଦିଲ୍ଲୀ ସରକାର ବନ୍ଦ କରିଦେବାରୁ ଅଳିଆ ଗଦା ହୋଇ ରହିଛି ବୋଲି ବିଜେପି ଅଭିଯୋଗ କରିଛି ।

ଅନ୍ୟପଟେ ଲ୍ୟାଣ୍ଡଫିଲ ସାଇଟରେ ପହଞ୍ଚିବା ପରେ ବିଜେପି ଉପରେ ବର୍ଷିଛନ୍ତି ମୁଖ୍ୟମନ୍ତ୍ରୀ କେଜରିଓ୍ବାଲ । ଗତ ୧୫ ବର୍ଷ ଧରି ନିଗମ ବିଜେପି ହାତରେ ରହିଛି । ଏହି ୧୫ ବର୍ଷରେ ବିଜେପି ଦିଲ୍ଲୀକୁ ୩ଟି ଅଳିଆ ପାହାଡ଼ ଭେଟି ଦେଇଛି ବୋଲି କେଜରିଓ୍ବାଲ କହିଛନ୍ତି ।