ଗଞ୍ଜାମ/ଗଜପତି: ବାତ୍ୟା ଭୟ ଟଳିବା ପରେ ଏବେ ବର୍ଷା ଦେଖାଉଛି ତାର ତାଣ୍ଡପ ଲୀଳା । ଆନ୍ଧପ୍ରଦେଶର କାକିନାଡ଼ା ନିକଟରରେ ଗଭୀର ଅବପାତ କାରଣରୁ ରାଜ୍ୟରେ ତୁହୁକୁ ତୁହା ବର୍ଷା ଲାଗି ରହିଛି । ଅବପାତ ପ୍ରଭାବରେ ଧୋଇ ଯାଇଛି ଦକ୍ଷିଣ ଓଡ଼ିଶା । ଗଜପତି ଏବଂ ଗଞ୍ଜାମରେ ବର୍ଷାର ପ୍ରଭାବ ଅଧିକ ମାତ୍ରାରେ ଦେଖିବାକୁ ମିଳିଛି । କେଉଁଠି ବର୍ଷା ଘର ଭାଙ୍ଗିଛି ତ ପୁଣି କେଉଁଠି ଘରେ ଆଣ୍ଠୁଏ ଉଚ୍ଚର ପାଣି ଭରି ରହିଛି । ବର୍ଷାକୁ ନେଇ ପାହାଡ଼ିଆ ଅଞ୍ଚଳରେ ଥିବା ଆଦିବାସୀ ମାନେ ଆତଙ୍କିତ ହୋଇପଡ଼ିଛନ୍ତି । ବିଶେଷ କରି ବାଘଲଟି ଜଳ ଭଣ୍ଡାର ଆର ପାରିରେ ଥଇଥାନ ଅପେକ୍ଷାରେ ରହିଥିବା ପାଞ୍ଚରୁ ଉର୍ଦ୍ଧ୍ୱ ଗାଁର ଲୋକମାନଙ୍କ ଚିନ୍ତା ବଢିଯାଇଛି ।
ବର୍ଷାର ପ୍ରକୋପ ବଢୁଥିବାରୁ ବାଘଲଟି ପ୍ରକଳ୍ପ ତରଫରୁ ସତର୍କ ସୂଚନା ଜାରି କରାଯାଇଥିବା ବେଳେ ପାହାଡ଼ ଉପରୁ ପାଣି ଖସି ଗାଁ ଭିତରେ ପ୍ରବେଶ କରୁଥିବା ଦେଖିବାକୁ ମିଳିଛି । ଏପଟେ ଦୁଇଦିନ ହେବ ବର୍ଷା ଜାରି ରହିଥିବା ବେଳେ ପାହାଡ଼ି ଇଲାକାର ଜନଜୀବନ ଅସ୍ତବ୍ୟସ୍ତ ହୋଇ ପଡିଥିବା ପରିଲିକ୍ଷିତ ହୋଇଛି ।
ସାନଖେମୁଣ୍ଡି ବ୍ଲକ କଉଡ଼ିଆ ପଂଚାୟତ ବଉଳଘାଇ ଗ୍ରାମ ସିନ୍ଧୁଆ ସ୍ବାଇଁଙ୍କ ଘର ଲଗାଣ ବର୍ଷା ରେ ବହୁ ପୁରାତନ ଘର ଛାତ ରୁ ପାଣି ବାହାରିବେଳେ ଅନ୍ୟ ଘର ବାଡ଼ ବା କାନ୍ଥ ଭୁଶୁଡି ଘରେ ପଡି ରହିଛି । ସେପଟେ ଘୋଡାହାଡ ଡ୍ୟାମ ରେ ଜଳପତ୍ତନ ବିପଦ ସଙ୍କେତ ତଳେ ପ୍ରବାହିତ ହେଉଛି । ଡ଼୍ୟାମର ଜଳଧାରଣ କ୍ଷମତା ୧୧୭.୮୦ ମିଟର ଥିବା ବେଳେ ମଙ୍ଗଳବାର ସକାଳ ୬ ଟା ସୁଦ୍ଧା ଜଳପତ୍ତନ ୧୧୫.୨୦ ମିଟର ରେ ପହଞ୍ଚିଛି । ଡ଼୍ୟାମ ଅଞ୍ଚଳରେ ୮୩ ମି. ମି ବର୍ଷା ହୋଇଥିବା ବେଳେ ନଦୀକୂଳିଆ ଲୋକଙ୍କ ସତର୍କ କରିଛି ଜଳସମ୍ପଦ ବିଭାଗ । ସ୍ପିଲୱେ ଦେଇ ନଦୀ ମଧ୍ୟକୁ ପାଣି ଛଡାଯିବ । ଘୋଡାହାଡ ନଦୀତଟବାସୀଙ୍କୁ ଡ୍ୟାମକୁ ଯିବାକୁ ବାରଣ କରାଯାଇଛି ।
ସେପଟେ ପାରଳାଖେମୁଣ୍ଡି ସୁବାସ ନଗରରେ ରାତି ତମାମ ତୁହାକୁ ତୁହା ବର୍ଷା ଲାଗି ରହିଥିବାରୁ ମାଟି କାନ୍ଥ ହଠାତ୍ ଭୁଶୁଡ଼ି ପଡ଼ିଲା । ଅଳ୍ପକେ ବର୍ତ୍ତିଲେ ହରିଶ୍ଚନ୍ଦ୍ର ନାଗବଂଶଙ୍କ ପରିବାରର ପାଞ୍ଚ ଜଣ ସଦସ୍ୟ। ବର୍ଷା ଯୋଗୁଁ ରାତିରେ ଘରଭିତରେ ପାଣି ପଡ଼ୁଥିବାରୁ ଶୋଇ ପାରିନଥିଲେ ଲୋକେ। ଏହି ସମୟରେ ମାଟି କାନ୍ଥଟି ଭୁଶୁଡି ପଡିଥିଲା। କାନ୍ଥ ଭୁଷୁଡି ଯିବାରୁ ସମ୍ପୂର୍ଣ୍ଣ ବାସହୀନ ସୋଇପଡିଛନ୍ତି ପରିବାରର ଲୋକେ। ତେବେ ଏମାନଙ୍କୁ ତୁରନ୍ତ ସହାୟତା ଯୋଗାଇ ଦେବା ପାଇଁ ପରିବାର ପକ୍ଷରୁ ଅନୁରୋଧ କରିଛନ୍ତି ।
ସେପଟେ ଗଜପତି ପାହାଡିଆ ଅଞ୍ଚଳରେ ଭୁଷ୍ଖଳନ ସମ୍ଭାବନା ଥିବାରୁ ପାଖାପାଖି ୫ଶହ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଜିଲ୍ଲାର ଆର୍ ଉଦୟଗିରି, ରାୟଗଡ଼, ଗୁମ୍ମା, କାଶୀନଗର, ଗୋଷାଣୀ ତଥା ପାରଳାଖେମୁଣ୍ଡି ଅଞ୍ଚଳର ୫୦୦ରୁ ଅଧିକ ପ୍ରଭାବିତ ଅନେକ ପରିବାରକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିବା ସହ ସୁଖିଲା ଓ ରନ୍ଧା ଖାଦ୍ୟର ବ୍ୟବସ୍ଥା କରାଯାଇଛି। ସମସ୍ତ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ରରେ ଅସ୍ଥାୟୀ ଆଶ୍ରୟସ୍ଥଳୀ ନିର୍ମାଣ କରାଯାଇ ବିଭିନ୍ନ ଅଧିକାରୀଙ୍କୁ ନିୟୋଜିତ କରାଯାଇଛି। ସାମ୍ଭାବ୍ୟ ଭୁଷ୍ଖଳନ ଅଞ୍ଚଳକୁ ବିଶେଷ ଦୃଷ୍ଟି ଦିଆଯାଇଛି ।
ତିତିଲି ବାତ୍ୟା ଫଳରେ ଗଜପତି ଏବଂ ଗଞ୍ଜାମ ଜିଲ୍ଲା ତୁମ୍ବା ନିକଟରେ ଥିବା ପ୍ରସିଦ୍ଧ ପର୍ଯ୍ୟଟନ ସ୍ଥଳ ପର୍ଶୁରାମ କୁଣ୍ଡ ଧ୍ୱଂସ ବିଧ୍ୱସ୍ତ ହେବା ସହ ପୁରିଆ ସାହି କ୍ଷୁଦ୍ର ଜଳ ପ୍ରକଳ୍ପ ମାଟିରେ ମିଶିଯାଇଥିଲା । ଏପର୍ଯ୍ୟନ୍ତ ଆଦିବାସୀ ଇଲାକାର ଲୋକମାପେ ଏଯାଏଁ ସେଥିରୁ ମୁକୁଳି ପାରୁନାହାନ୍ତି । ବହୁ ପରିବାର ଏବେ ବି ବେଘର ହୋଇ ରହିଛନ୍ତି । ତିତିଲି ବାତ୍ୟାର ଘାଆ ଏଯାଏଁ ଲିଭିନଥିବା ବେଳେ ଆଜି ପୁଣି ଲଘୁଚାପ ବର୍ଷା ଘାଆରେ ଲୁଣ ଛିଞ୍ଚିଛି ।
