ଗାଙ୍ଗୁଲିଙ୍କ ପରେ ତାଙ୍କ ଝିଅ ସାନା କରୋନାରେ ଆକ୍ରାନ୍ତ

କୋଲକାତା: ବିସିସିଆଇ ସଭାପତି ସୌରଭ ଗାଙ୍ଗୁଲି କରୋନାର ଆକ୍ରାନ୍ତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । କିଛି ଦିନ ହସ୍ପିଟାଲରେ ଚିକିତ୍ସା ହୋଇ ଘରକୁ ଫେରିବା ପରେ ତାଙ୍କ ଝିଅ ସାନା କୋଭିଡ ପଜିଟିଭ୍ ଚିହ୍ନଟ ହୋଇଛନ୍ତି । ସାନା କରୋନାରେ ଆକ୍ରାନ୍ତ ହୋଇଥିବାବେଳେ ତାଙ୍କ ମଧ୍ୟରେ କରୋନାର ସ୍ୱଳ୍ପ ଲକ୍ଷଣ ଦେଖାଯାଇଛି । ଯାହା ଫଳରେ ସେ ଡାକ୍ତରଙ୍କ ପରାମର୍ଶରେ ଘରେ ଆଇସୋଲେସନରେ ରହିଛନ୍ତି । ଗାଙ୍ଗୁଲିଙ୍କ ଝିଅଙ୍କ ସହ ତାଙ୍କ ପତ୍ନୀ ଡୋନା ଗାଙ୍ଗୁଲିଙ୍କର ମଧ୍ୟ କରୋନା ଟେଷ୍ଟ ହୋଇଥିଲା କିନ୍ତୁ ଡୋନା ଗାଙ୍ଗୁଲିଙ୍କ ରିପୋର୍ଟ ନେଗେଟିଭ୍ ଆସିଥିଲା ।

କିଛି ଦିନ ପୂର୍ବରୁ ସୌରଭ ଗାଙ୍ଗୁଲିଙ୍କ ମଧ୍ୟରେ କରୋନା ଲକ୍ଷଣ ଦେଖାଯାଇଥିଲା। ଏହା ପରେ ତାଙ୍କ ଟେଷ୍ଟ ରିପୋର୍ଟ ପଜିଟିଭ୍ ଆସିଥିଲା ଯାହା ଫଳରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । କରୋନା ପଜିଟିଭ୍ ହେବା ପରେ ତାଙ୍କ ସାମ୍ପୁଲ ଜେନମ ସିକ୍ୱେନ୍ସିଂ ପାଇଁ ପଠାଯାଇଥିଲା । କିନ୍ତୁ ତାଙ୍କ ରିପୋର୍ଟ ଓମିକ୍ରନ ନେଗେଟିଭ୍ ଆସିଥିଲା । କିନ୍ତୁ ତାଙ୍କ ମଧ୍ୟରେ ଡେଲଟା ଭାରିଆଣ୍ଟ ଥିବା ଚିହ୍ନଟ ହୋଇଥିଲେ ।

ତେବେ କରୋନାରେ କେବଳ ସୌରଭ ଗାଙ୍ଗୁଲି କିମ୍ବା ତାଙ୍କ ଝିଅ ସାନା ଆକ୍ରାନ୍ତ ହୋଇ ନାହାନ୍ତି, ତାଙ୍କ ବଡ଼ ଭାଇ ସ୍ନେହାଶିଷ ମଧ୍ୟ ଚଳିତ ବର୍ଷ ଆରମ୍ଭରୁ କରୋନାରେ ଆକ୍ରାନ୍ତ ହୋଇଥିଲେ। ଏଥି ସହ ୨୦୨୧ରେ ବିସିସିଆଇ ବସ୍ ଗାଙ୍ଗୁଲି ଦୁଇ ଥର ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ହସ୍ପିଟାଲରେ ମଧ୍ୟ ଭର୍ତ୍ତି କରାଯାଇଥିଲା।