ନନ୍ଦିଘୋଷ ବ୍ୟୁରୋ : ଅଞ୍ଚଳରେ ମିଳୁନି କାମ । ଫଳରେ ବାଧ୍ୟ ହୋଇ ବାହାର ରାଜ୍ୟକୁ ଦାନ ଖଟିବାକୁ ଯାଉଛନ୍ତି ହଜାର ହଜାର ଶ୍ରମିକ । ହେଲେ ସରକାରୀ ତଥ୍ୟ ଭିନ୍ନ । ମାତ୍ର ୩୫ ଜଣ ଶ୍ରମିକ ଗତପତି ଜିଲ୍ଲାରୁ ଯାଇଥିବା ରିପୋର୍ଟ । ଜିଲ୍ଲାର ସମସ୍ତ ସାତୋଟି ବ୍ଲକର ପ୍ରାୟ ୩୦ ହଜାରରୁ ଅଧିକ ଶ୍ରମିକ ସଂଗଠିତ ଓ ଅଣ ସଂଗଠିତ ଭାବରେ ବାହାର ରାଜ୍ୟରେ ନିର୍ମାଣ ଶ୍ରମିକ ଭାବରେ କାର୍ଯ୍ୟ କରୁଛନ୍ତି । କେତକ କ୍ଷେତ୍ରରେ ବିପଦ ସଙ୍କୁଳ କାର୍ଯ୍ୟରେ ନିୟୋଜିତ ହୋଇ ଦୁର୍ଘଟଣାର ଶିକାର ହେବା ଏବଂ ମୃତ୍ୟୁ ମୁଖରେ ପଡିବାର ଅନେକ ନଜିର ରହିଛି । ତଥ୍ୟ ଅନୁସାରେ ଗତ ୪ ବର୍ଷ ମଧ୍ୟରେ ୧୮ ଟି ଘଟଣା ନଜରକୁ ଆସିଥିବା ବେଳେ ବାହାର ରାଜ୍ୟରେ କାମ କରୁଥିବା ସମୟରେ ଅଘଟଣ ଘଟି ୧୪ ଜଣ ଶ୍ରମିକଙ୍କ ଜୀବନ ଯାଇଛି । ୪ ଜଣଙ୍କ ଅଙ୍ଗ କଟି ଯାଇଥିବା ପରିସ୍ଥିତିରେ ଉଦ୍ଧାର କରାଯାଇଛି । ଅଞ୍ଚଳରେ ମନେରଗା ଭଳି ଯୋଜନା ସଠିକ ଭାବରେ କାର୍ଯ୍ୟକାରୀ ହେଉନଥିବାରୁ ଏଭଳି ପରିସ୍ଥିତି ଉପୁଜୁଥିବା ଅଭିଯୋଗ ହୋଇଛି।
ଠିକାଦାର ଜରିଆରେ ହେଉ ଅବା ନିଜସ୍ଵ ଉଦ୍ୟମରେ ଶ୍ରମିକ ବାହାର ରାଜ୍ୟକୁ କାର୍ଯ୍ୟ କରିବାକୁ ଗଲେ। ଏହାର ତଥ୍ୟ ଜିଲ୍ଲା ଶ୍ରମ ବିଭାଗ ପାଖରେ ରହୁ ନାହିଁ। ଶ୍ରମିକ ପଞ୍ଜିକରଣ ନେଇ ପାଞ୍ଚାୟତ ସ୍ତରରେ ପଞ୍ଚାୟତ ନିର୍ବାହୀ ଅଧିକାରୀ ମାନଙ୍କୁ ଦାୟିତ୍ବ ନ୍ୟସ୍ତ କରାଯାଇଛି । ଗାଁ ଗାଁ ରୁ ତଥ୍ୟ ନେଇ ପଞ୍ଜୀକରଣ କରିବା କଥା କିନ୍ତୁ ତାହା ସେମାନେ କରୁନଥିବା କାରଣରୁ ସରକାରଙ୍କ ନିକଟରେ ଦାଦନ ଶ୍ରମିକଙ୍କ ପ୍ରକୃତ ତଥ୍ୟ ରହୁନଥିବା କହିଛନ୍ତି ଜିଲ୍ଲା ଶ୍ରମ ଅଧିକାରୀ ଭାରତୀ ବେହେରା ।
ଦାଦନ ରୋକିବାକୁ ଠୋସ ପଦକ୍ଷେପ ଗ୍ରହଣ କରାଯାଉ ନଥିବା ବେଳେ ବାହାର ରାଜ୍ୟକୁ ଯାଉଥିବା ଶ୍ରମିକଙ୍କ ତଥ୍ୟ ବି ସରକାରଙ୍କ ନିକଟରେ ନାହିଁ। କେଉଁଠି ନା କେଉଁଠି ଶ୍ରମ ବିଭାଗର ତତ୍ପରତାର ଘୋର ଅଭାବ ରହିଛି। ଫଳରେ ଶ୍ରମିକ ସରକାରଙ୍କ ସୁବିଧା ସୁଯୋଗ ପାଇବାରୁ ବଞ୍ଚିତ ହେଉଛନ୍ତି।
