ଲୋକଙ୍କ ଉପରେ ପଡ଼ିଲାଣି ତେଲ ଚଡ଼କ, ଲଗାତାର ସପ୍ତମ ଦିନ ପାଇଁ ବଢିଲା ପେଟ୍ରୋଲ ଓ ଡିଜେଲ୍ ଦର

ଭୁବନେଶ୍ୱର: କରୋନା ସଂକଟରୁ ଏଯାଏ ବାହାରିପାରିନି ଦେଶ । ଏପଟେ ଲୋକଙ୍କ ଉପରେ ପଡିଲାଣି ତେଲ ଚଡ଼କ । ଲଗାତାର ଭାବେ ତେଲଦର ବୃଦ୍ଧି ଏବେ ଲଗାଇଲାଣି ନିଆଁ । ଖାଲି ତେଲତ ବଢୁନି ବରଂ ବଜାରର ଦରଦାମ ବୃଦ୍ଧିକୁ ବି ଇନ୍ଧନ ଯୋଗାଉଛି ବର୍ଦ୍ଧିତ ତେଲଦର । ଗତକାଲି ପେଟ୍ରୋଲ ଲିଟର ପିଛା ୩୦ ପଇସା ଓ ଡିଜେଲ ଲିଟର ପିଛା ୩୫ ପଇସା ବୃଦ୍ଧି ପାଇଥିଲା । ଫଳରେ ଭୁବନେଶ୍ୱରରେ ପେଟ୍ରୋଲ ଦର ୧୦୫ ପାର ହୋଇଥିବା ବେଳେ ମାଲକାନଗିରିରେ ଦର ୧୧୦ ଟଙ୍କା ୫୮ ପଇସା ଛୁଇଁଥିଲା ।

ତେବେ ଆଜି ସୋମବାର ଲଗାତାର ଭାବେ ସପ୍ତମ ଦିନ ପାଇଁ ବଢିଛି ପେଟ୍ରୋଲ ଓ ଡିଜେଲ୍ ଦର । ଦେଶର ରାଜଧାନୀ ଦିଲ୍ଲୀରେ ପେଟ୍ରୋଲ ଦର ୩୦ ପଇସା ବୃଦ୍ଧି ପାଇଁ ଲିଟର ପିଛା ଦର ୧୦୪ ଟଙ୍କା ୪୪ ପଇସାରେ ପହଞ୍ଚିଛି । ଡିଜେଲ ୩୫ ଟଙ୍କା ବୃଦ୍ଧି ପାଇଁ ୯୩ ଟଙ୍କା ୧୭ ପଇସାରେ ପହଞ୍ଚିଛି । ସେହିଭଳି ମୁମ୍ବାଇର ପେଟ୍ରୋଲ ଦର ୧୧୦ ଟଙ୍କା ୪୧ ପଇସା ଥିବାବେଳେ ଡିଜେଲ ଦର ୧୦୧ ଟଙ୍କା ୩ ପଇସା ରହିଛି । ଲଗାତାର ଭାବେ ବଢୁଥିବା ତୈଳ ଦରକୁ ନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ବଢିବାରେ ଲାଗିଛି । କେନ୍ଦ୍ର ସରକାର ଯଥାଶୀଘ୍ର ଏ ଦିଗରେ ଧ୍ୟାନ ଦେବା ସହ ଦର କମାଇବା ପାଇଁ ସାଧାରଣରେ ଦାବି ହୋଇଛି ।