ଜୁଲାଇ ପହିଲାରୁ ବଦଳିଗଲା ଆଧାର କାର୍ଡର ଏହି ସବୁ ନିୟମ, ଏବେ ଏହି କାମ ପାଇଁ ଜରୁରୀ ଆଧାର

ନୂଆଦିଲ୍ଲୀ: ଜୁଲାଇ ୧ ବର୍ଷର ସବୁଠାରୁ ଗୁରୁତ୍ୱପୂର୍ଣ୍ଣ ଦିନ ହୋଇପାରେ । କାରଣ ଆଜିଠାରୁ ଅନେକ ନିୟମ ବଦଳିଛି । ଆୟକର ଏବଂ ଆଧାର ସମ୍ବନ୍ଧୀୟ ନିୟମ ଆଜିଠାରୁ ବଦଳି ଯାଇଛି । ବର୍ତ୍ତମାନ ଇନକମ ଟ୍ୟାକ୍ସ ରିଟର୍ଣ୍ଣ ଫାଇଲ ଦାଖଲ କରିବା ସମୟରେ ଆଧାର ନମ୍ବରର ସବିଶେଷ ତଥ୍ୟ ଦେବା ଆବଶ୍ୟକ ହେବ । ଏହାର ଅର୍ଥ ହେଉଛି ଆଜିଠାରୁ ଯଦି ଆପଣଙ୍କର ଆଧାର ନମ୍ବର ନାହିଁ, ତେବେ ଆପଣ ରିଟର୍ନ ଫାଇଲ୍ କରିପାରିବେ ନାହିଁ । ଜୁଲାଇର ପ୍ରଥମ ଦିନରୁ ଆଧାରର ଗୁରୁତ୍ୱ ବୃଦ୍ଧି ପାଇଛି । ଯଦି ଆପଣଙ୍କର ଆଧାର ନାହିଁ, ତେବେ ଜୁଲାଇ ୧ ପରେ ଆପଣ ପ୍ୟାନ କାର୍ଡ ମଧ୍ୟ କରିପାରିବେ ନାହିଁ ।

କେବଳ ଏତିକି ନୁହେଁ, ପାସପୋର୍ଟ ପାଇବା ପାଇଁ ବୈଦେଶିକ ମନ୍ତ୍ରଣାଳୟ ଆଧାରକୁ ବାଧ୍ୟତାମୂଳକ କରିଛି । ଜୁଲାଇ ୧ ପରେ, ଯଦି ଆପଣଙ୍କର ଆଧାର ନାହିଁ, ତେବେ ଆପଣଙ୍କର ପାସପୋର୍ଟ ତିଆରି ହୋଇପାରିବ ନାହିଁ ।

PF ଖାତା ସହିତ ଆଧାରର ବାଧ୍ୟତାମୂଳକ ଲିଙ୍କ୍

କର୍ମଚାରୀ ପ୍ରୋଭିଡେଣ୍ଟ ଫଣ୍ଡ ସଂଗଠନ (ଇପିଏଫଓ) ଆଧାରକୁ ପିଏଫ୍‌ ଆକାଉଣ୍ଟ ସହିତ ଲିଙ୍କ କରିବା ବାଧ୍ୟତାମୂଳକ କରିଛି । ଯେଉଁମାନେ ପେନସନ ନେଉଛନ୍ତି ସେମାନଙ୍କୁ ଆଧାର ନମ୍ବର ବିଷୟରେ ମଧ୍ୟ ସୂଚନା ଦେବାକୁ ପଡ଼ିବ । ଇପିଏଫ୍ଓ ଅନୁଯାୟୀ, ଆଧାର ଲିଙ୍କେଜ୍ ହେତୁ ପିଏଫ୍ ପ୍ରତ୍ୟାହାର ଏବଂ ସମାଧାନ ପାଇଁ କମ୍ ସମୟ ଲାଗିବ ।

ଆପଣଙ୍କର ଆଧାର କେଉଁ କେଉଁ ଠାରେ ବ୍ୟବହୃତ ହୋଇଛି ଜାଣନ୍ତୁ

ସର୍ବପ୍ରଥମେ, ଆପଣ ୱେବସାଇଟ୍ https://resident.uidai.gov.in ଖୋଲନ୍ତୁ ।ଏବଂ ଆଧାର ପ୍ରାମାଣିକିକରଣ ଇତିହାସ ପୃଷ୍ଠାକୁ ଯିବାକୁ ଲିଙ୍କରେ କ୍ଲିକ୍ କରନ୍ତୁ । ବର୍ତ୍ତମାନ ଆପଣଙ୍କର ଆଧାର ନମ୍ବର ଏବଂ ସୁରକ୍ଷା କୋଡ୍ ପୁରଣ କରନ୍ତୁ । ଏହା ପରେ, ‘OTP ସୃଷ୍ଟି’ ଉପରେ କ୍ଲିକ୍ କରନ୍ତୁ । ମୋବାଇଲରେ OTP ଗ୍ରହଣ କରାଯିବ । ମୋବାଇଲକୁ ଓଟିପି ଯିବାକୁ ହେଲେ ପ୍ରଥମେ ଏଥିପାଇଁ ଆପଣଙ୍କର ମୋବାଇଲ୍ ନମ୍ବର UIDAI ୱେବସାଇଟରେ ଲିଙ୍କ ହୋଇଥିବା ଜରୁରୀ । ଏହାପରେ ଆପଣ ଆପଣଙ୍କର ସବୁ ଡ଼ାଟା ପାଇପାରିବେ ।