ବନ୍ଧୁ ହେଲା ବଇରୀ, ଧାର ଟଙ୍କାକୁ କେନ୍ଦ୍ର କରି ସାଙ୍ଗଙ୍କୁ ହତ୍ୟା
ଖୋର୍ଦ୍ଧା: ଟଙ୍କା ଆଗରେ ତୁଚ୍ଛ ହେଲା ବନ୍ଧୁତା । ଶତ୍ରୁତାରେ ବଦଳିଗଲା ଘନିଷ୍ଠ ସମ୍ପର୍କ । ଶେଷରେ ଧାର ଟଙ୍କାକୁ କେନ୍ଦ୍ର କରି ବନ୍ଧୁକୁ ହତ୍ୟା କଲା ବନ୍ଧୁ । ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ମୁକୁନ୍ଦପ୍ରସାଦ ସ୍ପିନିଂ ମିଲ୍ କଲୋନୀରେ ଘଟିଛି ଏଭଳି ଅଭାବନୀୟ ଘଟଣା । ମହେଶ୍ୱର ଦାସ ଏବଂ ରଶ୍ମୀ ରଞ୍ଜନ ପାଟ୍ଟଯୋଶୀଙ୍କ ମଧ୍ୟରେ ଦୀର୍ଘଦିନ ଧରି ଭଲ ବନ୍ଧୁତା ରହିଥିଲା । ରଶ୍ମୀଙ୍କ ଠାରୁ ମହେଶ୍ୱର କିଛି ଅର୍ଥ ଧାର ନେଇ ଶୁଝିନଥିଲେ ।
ଏଥିପାଇଁ ଉଭୟଙ୍କ ମଧ୍ୟରେ ବାରମ୍ବାର ବଚସା ହେଉଥିଲା । ତେବେ ଆଜି ବିବାଦ ଉଗ୍ର ରୂପ ନେଇଥିଲା । ଏଥିରେ ଉତକ୍ଷିପ୍ତ ହୋଇ ପାଖରେ ରଖିଥିବା ଛୁରିରେ ରଶ୍ମୀଙ୍କ ଛାତି, ପେଟ ଓ ମୁଣ୍ଡକୁ ଆକ୍ରମଣ କରିଥିଲେ ମହେଶ୍ୱର । ଏଥିରେ ଗୁରୁତର ହୋଇ ଡାକ୍ତରଖାନା ଯିବା ବାଟରେ ରଶ୍ମିଙ୍କର ମୃତ୍ୟୁ ହୋଇଥିଲା । ଅଭିଯୋଗ ପରେ ୨ଟି ଟିମ୍ ଗଠନ କରି ଅଭିଯୁକ୍ତକୁ ପୋଲିସ ଖୋଜିବା ସହିତ ତଦନ୍ତ ଜାରି ରଖିଛି ।
