ପୁଣି ପଦାରେ ପଡ଼ିଲା ଛାତ୍ର କଂଗ୍ରେସ କଳି, ସଭାପତିଙ୍କ ବିନା ଅନୁମତିରେ ହୋଇଥିଲା ଶୋଭାଯାତ୍ରା

ଭୁବନେଶ୍ୱର: କଂଗ୍ରେସର ଛାମୁଆ ସଂଗଠନରେ ବିବାଦ । ରାଜ୍ୟ ଛାତ୍ର କଂଗ୍ରେସ ସଭାପତିଙ୍କ ଅଜାଣତରେ ଛାତ୍ର କଂଗ୍ରେସ ନାଁରେ ରାଲି ଓ ପ୍ରତିବାଦକୁ ନେଇ ମୁହାମୁହିଁ । କାହା ଇଙ୍ଗିତରେ ଆଜି ଛାତ୍ର କଂଗ୍ରେସ ନାଁରେ ପ୍ରତିବାଦ ଶୋଭାଯାତ୍ରା କରାଯାଇଛି, ସଂଗଠନର ସଭାପତି ପ୍ରଶ୍ନ ଉଠାଇଛନ୍ତି । ଯେଉଁମାନେ ଦଳର ଶୃଙ୍ଖଳା ଭଙ୍ଗ କରିଛନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଚେତାବନୀ ଦେଇଛନ୍ତି । ଯାହାକୁ ନେଇ ଛାତ୍ର କଂଗ୍ରେସ ଏବେ ଦୁଇଫାଳ ।

କିଏ ଅସଲି, କିଏ ନକଲି ? ଛାତ୍ର କଂଗ୍ରେସ ଦୁଇଫାଳ । ଏଥର ଦଳର ଛାତ୍ର ସଂଗଠନରେ ବିବାଦ ଉଗ୍ରରୂପ ନେଇଛି । ମନ୍ତ୍ରୀ ପ୍ରତାପ ଜେନାଙ୍କ ବାସଭବନ ଘେରାଉ ନିଷ୍ପତ୍ତି ନେଇ ନବନିଯୁକ୍ତ ଛାତ୍ର କଂଗ୍ରେସ ସଭାପତି ୟାସିବ ନଓ୍ୱାଜ ଓ ବିରୋଧୀ ଗୋଷ୍ଠୀ ମୁହାମୁହିଁ ହୋଇଛନ୍ତି । ଛାତ୍ର କଂଗ୍ରେସ ସଭାପତିଙ୍କ କହିବା କଥା, ତାଙ୍କ ଅନୁମତି ବିନା କିଛି ଯୁବକ ଛାତ୍ର କଂଗ୍ରେସର ବ୍ୟାନରରେ ପ୍ରତିବାଦ କରିଛନ୍ତି । କାହା ଇଙ୍ଗିତରେ ଏପରି କରାଯାଇଛି, ତା’ର ଜବାବ ମଗାଯିବ । ଦଳୀୟ ଶୃଙ୍ଖଳା ଭାଙ୍ଗି ଯିଏ ଏହି ଶୋଭାଯାତ୍ରା ଓ ପ୍ରତିବାଦ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଛାତ୍ର କଂଗ୍ରେସ ସଭାପତି କହିଛନ୍ତି ।

ପ୍ରତିବାଦ ନେଇ ଛାତ୍ର କଂଗ୍ରେସ ସଭାପତି ପ୍ରଶ୍ନ ଉଠାଇବା ପରେ ଜବାବ ଦେଇଛନ୍ତି ଆନ୍ଦୋଳନକାରୀ ଛାତ୍ରନେତା । ଛାତ୍ର କଂଗ୍ରେସର କିଛି ନକଲି ସଂଗଠନ ନାହିଁ ବୋଲି ସେ କହିଛନ୍ତି ।

ସୂଚନାଯୋଗ୍ୟ ମାହାଙ୍ଗା ଡବଲ ମର୍ଡର ପ୍ରତିବାଦରେ ଛାତ୍ର କଂଗ୍ରେସ ନାଁରେ ମନ୍ତ୍ରୀ ପ୍ରତାପ ଜେନାଙ୍କ ବାସଭବନ ଘେରାଉ ଓ ପ୍ରତିବାଦ ଶୋଭାଯାତ୍ରା କରାଯାଇଥିଲା । ଭୁବନେଶ୍ୱର ଶିଶୁଭବନ ଛକରେ ପୋଲିସ ସହ ହୋଇଥିଲା ଧସ୍ତାଧସ୍ତି । ଅନେକ ଆନ୍ଦୋଳନକାରୀଙ୍କୁ ପୋଲିସ ଉଠାଇ ନେଇଥିଲା ।