ନନ୍ଦିଘୋଷ ବ୍ୟୁରୋ :ରୋଗୀଙ୍କ ପାଇଁ ମାଗଣା ଔଷଧ ବ୍ୟବସ୍ଥା କରିଛନ୍ତି ସରକାର । ହେଲେ ବାଗଡିଆ ନୂତନ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଏହା ବଣ୍ଟନ ନହୋଇ ପୋଡି ଦିଆଯାଉଥିବା ଅଭିଯୋଗ ହୋଇଛି। ସ୍ୱାସ୍ଥ୍ୟକେନ୍ଦ୍ର ଠାରୁ ଅଳ୍ପ ଦୂରରେ ପ୍ରାୟ ୨ ଲକ୍ଷ ଟଙ୍କାର ଔଷଧ ପୋଡାଯାଉଥିବା ଚିତ୍ର ସାମ୍ନାକୁ ଆସିଛି। କିଛିଦିନ ତଳେ ବାଗଡିଆ ଡାକ୍ତରଖାନା କର୍ମଚାରୀ ସଠିକ୍ ଭାବେ ଯାଞ୍ଚ ନକରି ଜଣେ ରୋଗୀଙ୍କୁ ଏକ୍ସପାୟରୀ ମେଡିସିନ ଦେଇଥିଲେ। ରୋଗୀ ଜାଣିବା ପରେ ଔଷଧ ଆଣି ସ୍ୱାସ୍ଥ୍ୟକେନ୍ଦ୍ରରେ ଫେରାଇଥିଲେ। ଏହାପରେ ସ୍ୱାସ୍ଥ୍ୟକେନ୍ଦ୍ରରେ ବହୁ ଏକ୍ସପାୟରୀ ଔଷଧ ଥିବା ଜଣାପଡିଥିଲା।ସରକାର ରୋଗୀଙ୍କୁ ମାଗଣା ସ୍ୱାସ୍ଥ୍ୟ ସେବା ଯୋଗାଇବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ସଫଳ ରୂପାୟନ ହୋଇପାରୁନି। ରୋଗୀ ଓ ସମ୍ପର୍କୀୟ ମେଡିକାଲରୁ ଔଷଧ ନପାଇ ବାହାରୁ କିଣି ଖର୍ଚ୍ଚାନ୍ତ ହେଉଛନ୍ତି। ଚିକିତ୍ସା ପାଇଁ ଆସି ଆବଶ୍ୟକ ଔଷଧ ମିଳୁନଥିବାରୁ ଅଭିଯୋଗ ବଢୁଛି।ଏକ୍ସପାୟରୀ ଔଷଧ ଥିବା ଜଣାପଡିବା ପରେ ମେଡିକାଲ କର୍ତ୍ତୃପକ୍ଷ ତାକୁ ନଷ୍ଟ କରିବା ପାଇଁ ମେଡିକାଲ ନିକଟରେ ଖୋଲାରେ ପୋଡି ଦେଇଥିଲେ। ନିୟମ ଅନୁସାରେ ଏକ୍ସପାୟରୀ ଔଷଧ ନଷ୍ଟ ପ୍ରକ୍ରିୟା ଅଛି, ହେଲେ ଏଭଳି ଖୋଲାରେ ପୋଡିବା କେତେ ଯୁକ୍ତିଯୁକ୍ତ ତାକୁ ନେଇ ପ୍ରଶ୍ନ ଉଠିଛି।
