ଜନସଂଖ୍ୟାର ୬୪ ପ୍ରତିଶତ ଟିକା ନେବା ପରେ ମାସ୍କ ମୁକ୍ତ ହେବାକୁ ଯାଉଛି ବ୍ରିଟେନ୍
ଲଣ୍ଡନ: କରୋନା ଓ ଟିକାକରଣକୁ ନେଇ ବ୍ରିଟେନରୁ ଏକ ଭଲ ଖବର ଆସିଛି । ବ୍ରିଟେନରେ କରୋନା କଟକଣାକୁ ପୂରା ଉଠାଇ ଦିଆଯିବ । ଏଣିକି ଲୋକ ବିନା ମାସ୍କ ଓ ସାମାଜିକ ଦୂରତା ବିନା ବୁଲି ପାରିବେ । ଟିକାକରଣ ସହ କରୋନାର ବଢ଼ୁଥିବା ମାମଲା ମଧ୍ୟରେ ବ୍ରିଟେନ୍ ମାସ୍କ ମୁକ୍ତ ଦେଶ ହେବାକୁ ଯାଉଛି । ବ୍ରିଟିଶ୍ ସରକାର ଏହି ଦିନକୁ ସ୍ୱାଧୀନତାର ଦିନ ଭାବେ ପାଳନ କରିବାକୁ ପ୍ରସ୍ତୁତି ଚଳାଇଛନ୍ତି । ଏହି ଘୋଷଣା କରିଛନ୍ତି ପ୍ରଧାନମନ୍ତ୍ରୀ ବୋରିଶ ଜନସନ୍ ।
ବୋରିଶ ଜନସନ କହିଛନ୍ତି, ‘ଆମେ ସାମାଜିକ ଦୂରତା, ମୁହଁରେ ମାସ୍କ ଆଦି ନିୟମକୁ ଶେଷ କରିବାକୁ ଯାଉଛୁ । ଯଦି ଆପଣ ଏହି ନିୟମକୁ ମାନିବାକୁ ଚାହୁଁଛନ୍ତି ତ ଆମେ ରୋକିବୁ ନାହିଁ । ଜୁଲାଇ ୧୯ରୁ କଟକଣା ହଟାଇବା ପ୍ରକ୍ରିୟା ଆରମ୍ଭ ହେବ । ତେବେ ଏନେଇ ଚୂଡ଼ାନ୍ତ ନିଷ୍ପତ୍ତି ୧୨ ଜୁଲାଇରେ ନିଆଯିବ ।’
ଚତୁର୍ଥ ପର୍ଯ୍ୟାୟରେ କେବଳ ମାସ୍କ କି ସାମାଜିକ ଦୂରତା ନୁହେଁ ଅନ୍ୟ କେତକ କଟକଣାକୁ ସରକାର ଉଠାଇ ନେବେ । ନାଇଟ୍ କ୍ଲବ୍, ମ୍ୟୁଜିକ୍ କନସର୍ଟ, ବିବାହ ଉତ୍ସବ, ସିନେମା ହଲ୍ ଓ ସମସ୍ତ ବାଣିଜ୍ୟିକ ଅନୁଷ୍ଠାନ ପୁଣି ଥରେ ଖୋଲିବାକୁ ଅନୁମତି ମିଳିବ ।
ବ୍ରିଟେନ୍ ଜନସଂଖ୍ୟାର ୬୪ ପ୍ରତିଶତ ଲୋକ କୋଭିଡ୍ ଟିକାର ଦ୍ୱିତୀୟ ଡୋଜ୍ ନେଇ ସାରିଛନ୍ତି । ସରକାର ଟିକାକରଣ ଶକ୍ତିରେ କଟକଣା ଉଠାଇବାକୁ ଯାଉଛନ୍ତି । ଏହା ପୂର୍ବରୁ ଇସ୍ରାଏଲ୍, ଭୁଟାନ, ଆମେରିକା, ନ୍ୟୁଜିଲାଣ୍ଡ ଓ ଚୀନ୍ ଆଦି ଦେଶ ମାସ୍କ ମୁକ୍ତ ହୋଇ ସାରିଛନ୍ତି ।
