ଚୋରି ଟଙ୍କା ହଡ଼ପ କରି ଜେଲ୍ ଗଲେ ୪ ପୋଲିସ୍

ଫିରୋଜାବାଦ: ୟୁପି ପୋଲିସ ଖାକିରେ ଦାଗ ।  ଚୋର ପାଖରୁ ଟଙ୍କା ହଡପ କରି ଫସିଲେ ୪ ପୋଲିସ କମର୍ଚାରୀ । ନିଲମ୍ବିତ ହେଲେ, ଜେଲ୍ ବି ଗଲେ । ଘଟଣାଟି ଫିରୋଜାବାଦ ସିରସାଗଞ୍ଜ ଥାନାରେ ଘଟିଛି । ଥାନା କମର୍ଚାରୀମାନେ ଧରିଥିବା ଚୋରଙ୍କ ପାଖରୁ ଜବତ ୯୬ ହଜାର ଟଙ୍କା ହଡପ କରିବା ସହ ସେମାନଙ୍କୁ ଛାଡି ଦେଇଥିଲେ । ତଦନ୍ତରୁ ସତ ଜଣା ପଡ଼ିବା ପରେ ଏସଏସପି ସେମାନଙ୍କୁ ନିଲମ୍ବିତ କରିଥିଲେ ।

ସୂଚନାଯୋଗ୍ୟ, ଅକ୍ଟୋବର ୧୫ ତାରିଖରେ ଜଣେ ବ୍ୟବସାୟୀ ଇ-ରିକ୍ସାରେ ଦୋକାନନରୁ ଦୋକାନ ବୁଲି ମାଲ ଦେଉଥିଲେ । ରସୁଲପୁର ଅଞ୍ଚଳରେ ଏକ ଦୋକାନରେ ମାଲ ଦେବା ବେଳେ ଦୁଇ ଚୋର ଇ-ରିକ୍ସା ସିଟ୍ ତଳେ ଥିବା ୧ ଲକ୍ଷ ୧୦ ହଜାର ଟଙ୍କା ଚୋରି କରି ଫେରାର ହୋଇଯାଇଥିଲେ । ସିସିଟିଭିରୁ ଚିହ୍ନଟ ପରେ ଦୁଇ ଚୋର ପ୍ରିୟାଂଶୁ ଓ ଓମବୀରଙ୍କୁ ରସୁଲପୁର ପୋଲିସ ଗିରଫ କରିଥିଲା । ପଚରାଉଚରା ବେଳେ ସତ ପଦାକୁ ଆସିଥିଲା ।

ଚୋରଙ୍କ କହିବା ଅନୁସାରେ ଚୋରି କରି ଫେରାର ହେଉଥିବା ବେଳେ ସିରସାଗଞ୍ଜ ପୋଲିସ୍ ସେମାନଙ୍କୁ ଧରିଥିଲା । ଯାଞ୍ଚ ବେଳେ ସେମାନଙ୍କ ପାଖରୁ ୧ ଲକ୍ଷ ଟଙ୍କା ଜବତ ହୋଇଥିଲା । ଏହି ଟଙ୍କା ରାସ୍ତାରୁ ପାଇଥିବା ପୋଲିସକୁ କହିଥିଲେ । ଏହାପରେ ପୋଲିସ କର୍ମଚାରୀମାନେ ୪ ହଜାର ଟଙ୍କା ଫେରାଇ ବାକି ୯୬ ହଜାର ଟଙ୍କା ନେଇ ଯାଇଥିଲେ ।

ଘଟଣା ଜଣାପଡ଼ିବା ପରେ ରସୁଲପୁର ପୋଲିସ ଏନେଇ ସିରସାଗଞ୍ଜ ଥାନା ଏସଏସପି ଅଶୋକ ଶୁକ୍ଲାଙ୍କୁ ସୂଚନା ଦେଇଥିଲେ । ଏହାପରେ ଏସଏସପି ୪ ଅଭିଯୁକ୍ତ ପୋଲିସ କର୍ମଚାରୀ ସୁନୀଲ ଚନ୍ଦ୍ର, ରାଜେଶ କୁମାର, ସୁରେନ୍ଦ୍ର କୁମାର ଓ ବିଷ୍ଣୁ କୁଲକର୍ଣ୍ଣିଙ୍କୁ ଡାକି ପଚରାଉଚରା କରିବାରୁ ସେମାନେ ସତ ମାନି ଯାଇଥିଲେ । ଏହାପରେ ଏସଏସପି ସେମାନଙ୍କ ନିଲମ୍ବିତ କରିବା ସହ ଗିରଫ କରାଯାଇ ଜେଲ୍ ପଠାଇ ଦିଆଯାଇଛି ।