ନବରଙ୍ଗପୁର: ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ଇନ୍ଦ୍ରାବତୀ ଜଳ ଭଣ୍ଡାର ଅପର ପାର୍ଶ୍ୱରେ ଥିବା ପାଞ୍ଚ ଖଣ୍ଡ ଗ୍ରାମବାସୀ ପ୍ରଥମ ଥର ପାଇଁ ନିଜ ଗାଁରେ ମତଦାନ କରିବେ। ଏହି ପାଞ୍ଚ ଖଣ୍ଡ ଗ୍ରାମବାସୀ ବିଧାନସଭା ଓ ଲୋକସଭା ଭୋଟ ପାଇଁ ଜଳ ଭଣ୍ଡାର ପାର ହୋଇ ମତଦାନ କରିବାକୁ ଆସିବାକୁ ପଡୁଥିଲେ। ଚଳିତ ନିର୍ବାଚନରେ ପ୍ରଥମ ଥର ପାଇଁ ଜଳବନ୍ଦୀ ଅଂଚଳରେ ମତଦାନ ବ୍ୟବସ୍ଥା କରାଯାଇଛି। ପ୍ରଥମ ଥର ହେବାକୁ ଥିବା ଏହି ମତଦାନକୁ ସୁବ୍ୟବସ୍ଥିତ କରିବା ପାଇଁ ଆଗେଇ ଆସିଛି ଜିଲ୍ଲା ପ୍ରଶାସନ। ଏଥିପାଇଁ ନବରଙ୍ଗପୁର ଏଡିଏମ ନବୀନ ନାୟକ ଓ ମହେଶ୍ୱର ନାୟକ, ପ୍ରକଳ୍ପ ନିର୍ଦ୍ଦେଶକ ବିରଞ୍ଚି ନାରାୟଣ ଦରୱାନ, ଉପ ଜିଲ୍ଲାପାଳ ପ୍ରକାଶ ଚନ୍ଦ୍ର ମିଶ୍ର, ତେନ୍ତୁଳିଖୁଣ୍ଟି ବିଡିଓ ମନୋଜ କୁମାର ପାଣିଗ୍ରାହୀ ଇନ୍ଦ୍ରାବତୀ ଜଳ ଭଣ୍ଡାର ପାର ହୋଇ ପ୍ରଥମ ଥର ପାଇଁ ହେବାକୁ ଥିବା ଟାଙ୍ଗନୀ କୋଟ ଓ ଗୁରୁମାଇଁ ଗୁଡା ବୁଥରେ ପହଞ୍ଚିଛନ୍ତି।
ତେନ୍ତୁଳିଖୁଣ୍ଟି ବ୍ଲକ ମଞ୍ଚା ଗାଁ ପଂଚାୟତ ଅନ୍ତର୍ଗତ ତଥା ଜଳଭଣ୍ଡାର ଅପରପାର୍ଶ୍ୱ ଟାଙ୍ଗନୀ କୋଟ, ଗୁରୁମାଇଁ ଗୁଡା, ବାଗ୍ରା, ତଳଙ୍ଗ ଓ ଝଲାଗୁଡା ଏଭଳି ପାଞ୍ଚଟି ଗାଁ ରହିଛି । ଏହି ପାଞ୍ଚଟି ଗ୍ରାମରେ ୪୩୧ ଜଣ ଭୋଟର ଅଛନ୍ତି। ତେବେ ଟାଙ୍ଗନୀ କୋଟ ଗ୍ରାମରେ ହୋଇଥିବା ବୁଥରେ ଟାଙ୍ଗନୀକୋଟ, ଝଲାଗୁଡା ଓ ବାଗ୍ରା ଗ୍ରାମର ଭୋଟର ମତଦାନ କରିବେ। ସେହିଭଳି ଗୁରୁମାଇଁ ଗୁଡା ଠାରେ ହୋଇଥିବା ବୁଥରେ ଗୁରୁମାଇଁ ଗୁଡା ଓ ତଳଙ୍ଗ ଗ୍ରାମର ଭୋଟର ମତଦାନ କରିବେ।
