ଆତଙ୍କୀ ଆକ୍ରମଣ ଷଡ଼ଯନ୍ତ୍ର ମାମଲାରେ ଜୈଶ-ଇ-ମହମ୍ମଦର ୫ ଆତଙ୍କବାଦୀଙ୍କୁ ଆଜୀବନ କାରାଦଣ୍ଡ

ନୂଆଦିଲ୍ଲୀ: ଦେଶରେ ଆତଙ୍କୀ ହମଲା ଷଡଯନ୍ତ୍ର ମାମଲାରେ NIA ସ୍ପେଶାଲ କୋର୍ଟଙ୍କ ବଡ଼ ରାୟ । UAPA ଆକ୍ଟରେ ୬ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି କୋର୍ଟ । ୫ ଆତଙ୍କବାଦୀଙ୍କୁ ଆଜୀବନ କାରାଦଣ୍ଡ ଶୁଣାଇଛନ୍ତି ଦିଲ୍ଲୀ ପଟିଆଲା ହାଉସକୋର୍ଟ । ଜଣଙ୍କୁ ୫ବର୍ଷ କାରାଦଣ୍ଡ ପାଇଁ କୋର୍ଟ ରାୟ ଶୁଣାଇଛନ୍ତି । ୬ ଷଡ଼ଯନ୍ତ୍ରକାରୀ ସଜଦ ଅହମ୍ମଦ ଖାନ୍, ତନବୀର ଅହମ୍ମଦ ଗେନି, ବିଲାଲ ଅହମ୍ମଦ ମୀର, ମୁଜାଫର ଅହମ୍ମଦ ଭଟ୍ଟ, ଇସଫାକ ଅହମ୍ମଦ ଭଟ୍ଟ, ମେହରାଜ ଉଦ୍ଦିଦଙ୍କୁ ଦୋଷୀ ସାବ୍ୟସ୍ତ କରିଛନ୍ତି ।

ଭାରତରେ ହମଲା ପାଇଁ ପାକିସ୍ତାନର ଆତଙ୍କୀ ସଂଗଠନ ଜୈଶ ଏ ମହମ୍ମଦ ଷଡଯନ୍ତ୍ର କରିବା ସହ ଅନେକ ପ୍ରଶିକ୍ଷିତ ଆତଙ୍କବାଦୀ ଓ ବିସ୍ଫୋରକ ଏବଂ ମାରଣାସ୍ତ୍ର ଭାରତକୁ ପଠାଇଥିଲା । ଦୋଷୀ ସାବ୍ୟସ୍ତ ହୋଇଥିବା ୬ ଆତଙ୍କୀଙ୍କ ମଧ୍ୟରୁ ବିଲାଲ ମୀର ଓ ମୁଜାଫର ଭାରତରେ ଆତଙ୍କୀ ହମଲା ପାଇଁ ପ୍ଲାନ କରିଥିଲେ । ସଜଦ ଦିଲ୍ଲୀରେ ଯୁବଗୋଷ୍ଠୀଙ୍କୁ ପ୍ରଲୋଭିତ କରି ଆତଙ୍କବାଦୀ ପ୍ରଶିକ୍ଷଣ ଦେବା ପାଇଁ ପ୍ଲାନ କରୁଥିଲା । କୋର୍ଟରେ ପ୍ରମାଣିତ ହେବା ପରେ ୬ ଜଣଙ୍କୁ କୋର୍ଟ ଦୋଷୀ ସାବ୍ୟସ୍ତ କରିଛନ୍ତି ।