ପ୍ରଥମ ଦିନରେ ରତ୍ନଭଣ୍ଡାରରେ ୩ ଘଣ୍ଟା ୫୦ ମିନିଟ ସର୍ଭେ

ପୁରୀ: ସରିଲା ଶ୍ରୀମନ୍ଦିର ରତ୍ନଭଣ୍ଡାର ପ୍ରଥମ ଦିନର ଯାଞ୍ଚ । ୩ ଘଣ୍ଟା ୫୦ ମିନିଟ ସର୍ଭେ ପରେ ସମ୍ପୂର୍ଣ୍ଣ ଡାଟା କରାଯାଇଛି କଏଦ । ଭାରତୀୟ ପ୍ରତ୍ନତତ୍ତ୍ୱ ବିଭାଗର ବୈଷୟିକ ଟିମ ସର୍ଭେ କରିଥିବାବେଳେ ୩ ଦିନ ପର୍ଯ୍ୟନ୍ତ ସର୍ଭେ କରିବେ ବୋଲି ସୂଚନା ଦେଇଛନ୍ତି l

ଆଜି ପ୍ରଥମ ଦିନରେ ସର୍ଭେ ପୂର୍ଣ୍ଣାଙ୍ଗ ହୋଇ ନଥିବା ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ଯ ପ୍ରଶାସକ । ପ୍ରାୟ ୧୦ ମିଟର ପର୍ଯ୍ୟନ୍ତ ଏହି ସର୍ଭେ ସ୍ୱତନ୍ତ୍ର ମେସିନ ଦ୍ୱାରା କରାଯାଉଥିବା ବେଳେ ୩ ଦିନ ସର୍ଭେ ପରେ ସଂଗୃହିତ ଡାଟାକୁ ତର୍ଜମା କରାଯାଇ ରିପୋର୍ଟ ପ୍ରସ୍ତୁତ କରାଯିବ l ଭଣ୍ଡାର ଘର ଯାଞ୍ଚ ନେଇ ଦିନ ୨ ଟାରୁ ୬ ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନକୁ ବନ୍ଦ ରଖାଯାଇଥିଲା । ଏଥିପାଇଁ ଶ୍ରଦ୍ଧାଳୁ ଓ ସେବାୟତଙ୍କ ସହଯୋଗ ଲୋଡ଼ିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।

ସିଏସଆଇଆର ଓ ଏନଜିଆଇଆରର ଅଧିକାରୀଙ୍କ ସହ ୨୬ ଜଣିଆ ଟିମ ଭିତର ଭଣ୍ଡାର ଘରେ ସର୍ଭେ କରୁଛନ୍ତି । ନିରୀକ୍ଷଣ ପୂର୍ବରୁ ଶ୍ରୀମନ୍ଦିର କାର୍ଯ୍ୟାଳୟ ଅନୁଷ୍ଠିତ ହୋଇଥିଲା ବୈଠକ l ବୈଠକରେ ରତ୍ନ ଭଣ୍ଡାର ତଦାରଖ କମିଟିର ଅଧ୍ୟକ୍ଷ ଜଷ୍ଟିସ ବିଶ୍ୱନାଥ ରଥ, ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ସମେତ ଅନ୍ୟ ଅଧିକାରୀ ଉପସ୍ଥିତ ଥିଲେ l