ଗହଣା ଦୋକାନୀଙ୍କୁ ଗୁଳି କଲେ, ୧୫ ଲକ୍ଷ ଟଙ୍କାର ସୁନା ଓ ରୂପା ଅଳଙ୍କାର ଲୁଟିନେଲେ
ଭଦ୍ରକ: ଗୁଳି କରି ୧୫ ଲକ୍ଷ ଟଙ୍କାର ସୁନା ଓ ରୂପା ଅଳଙ୍କାର ଲୁଟ୍ । ଭଦ୍ରକ ଜିଲ୍ଲା ବାସୁଦେବପୁର ସୁଦର୍ଶନପୁର ମାଛହାଟ ଛକରେ ହୋଇଛିଏହି ଲୁଟ୍ । ଚକାଡ଼ୋଳା ଗହଣା ଦୋକାନ ମାଲିକଙ୍କଠାରୁ ଦୁର୍ବୃତ୍ତ ୧୫ଲକ୍ଷ ଟଙ୍କାର ସୁନା ଓ ରୂପା ଅଳଙ୍କାର ଲୁଟି ନେଇଛନ୍ତି । ଗତକାଲି ରାତିରେ ଦୋକାନ ବନ୍ଦ କରି ମାଲିକ ତାପସ ସାହୁ ଘରକୁ ବାହାରୁ ଥିବା ବେଳେ ୩ ଜଣ ଦୁର୍ବୃତ୍ତ ବାଇକରେ ଆସି ତାପସଙ୍କ ଗୋଡ଼କୁ ଗୁଳି ଚଳାଇଥିଲେ ।
ଗୁଳିଟି ତାପସଙ୍କ ଗୋଡ଼ରେ ନବାଜି ତଳେ ବାଜିଥିଲା । ତା’ପରେ ଦୁର୍ବୃତ୍ତମାନେ ସୁନା ଅଳଙ୍କାର ଥିବା ବ୍ୟାଗ୍ ଛଡ଼ାଇ ଚମ୍ପଟ ମାରିଥିଲେ। ବ୍ୟାଗ୍ରେ ପ୍ରାୟ ୧୫ ଲକ୍ଷ ଟଙ୍କାର ସୁନା ଓ ରୂପା ଥିବା ଅଭିଯୋଗ ହୋଇଛି । ସେହିପରି ତାଙ୍କ ପାଖରେ ଥିବା ନଗଦ ୨୦ ହଜାର ଟଙ୍କା ମଧ୍ୟ ଲୁଟି ନେଇଛନ୍ତି ଦୁର୍ବୃତ୍ତ । ତାପସଙ୍କ ମୋବାଇଲ ମଧ୍ୟ ଛଡ଼ାଇ ନେଇଛନ୍ତି ଲୁଟେରା । ପାଖରେ ଥିବା ଦୋକାନୀ ମାନେ ଭୟରେ ବାହରକୁ ବାହାରି ନଥିଲେ ।
ସେପଟେ ଲୁଟ ନେଇ ବାସୁଦେବପୁର ପୋଲିସ ଖବର ପାଇବା ପରେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି ଗୋଟିଏ ଗୁଳି ଓ ଖୋକା ଜବତ କରିଛି । ଲୁଟେରା ମାନେ କେଉଁ ଅଞ୍ଚଳର ଏବଂ ଏମାନଙ୍କର ଅନ୍ୟ କୈଣସି ଲୁଟ ଛିନତାଇ ସହ ଲିଙ୍କ ରହିଛି କି ନାହିଁ ତାହାର କାରଣ ଖୋଜୁଛି ପୋଲିସ ।
