ସନରାଇଜର୍ସ ହାଇଦ୍ରାବାଦ ଟିମର ଖେଳାଳିମାନେ ରହିଥିବା ହୋଟେଲରେ ଲାଗିଲା ନିଆଁ

ନୂଆଦିଲ୍ଲୀ: ବର୍ତ୍ତମାନ ଆଇପିଲ ୨୦୨୫ ଜାରି ରହିଥିବା ବେଳେ ଏହା ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି । ସନ ରାଇଜର୍ସ ହାଇଦ୍ରାବାଦର ଖେଳାଳିମାନେ ଯେଉଁ ହୋଟେଲରେ ରହୁଥିଲେ ସେଠାରେ ନିଆଁ ଲାଗିଛି । ହୋଟେଲର ତୃତୀୟ ମହଲାରେ ଥିବା ସ୍ପା’ରେ ନିଆଁ ଲାଗିଥିବା ସୂଚନା ମିଳିଛି । ହାଇଦ୍ରାବାଦର ବଞ୍ଜାରା ହିଲ୍ସ ପାର୍କ ହ୍ୟାତ ହୋଟେଲରେ ଖେଳାଳିମାନେ ରହିଥିଲେ । ସବୁଠାରୁ ବଡ଼ କଥା ହେଉଛି, ହୋଟେଲରେ ଯେଉଁ ସମୟରେ ନିଆଁ ଲାଗିଥିଲା, ସେତେବେଳକୁ ଖେଳାଳିମାନେ ହୋଟେଲ ପରିସରରୁ ବାହାରି ସାରିଥିଲେ ।

ଏହି ଅଗ୍ନିକାଣ୍ଡ ଘଟଣାରେ ହୋଟେଲରେ ଥିବା କୌଣସି ଅତିଥି କି ଖେଳାଳିଙ୍କର କିଛି କ୍ଷତି ଘଟି ନାହିଁ । ଅଫିସିଭାଲ ଭାବେ ଏନେଇ ସୂଚନା ଦିଆଯାଇଛି । ତେବେ ଅଗ୍ନିକାଣ୍ଡର କାରଣ ସମ୍ପର୍କରେ ଯାଞ୍ଚ ଚାଲିଛି । ଆସନ୍ତା ଗୁରୁବାର ଦିନ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ସନରାଇଜର୍ସ ହାଇଦ୍ରାବାଦ ଖେଳିବ । ସେଥିପାଇଁ ପୂରା ଟିମ୍ ସକାଳୁ ହିଁ ବିମାନବନ୍ଦର ଅଭିମୂଖେ ଯାତ୍ରା କରିସାରିଥିଲା । ତେଣୁ ଖେଳାଳିମାନେ ଏହି ଘଟଣାରେ ପ୍ରଭାବିତ ହୋଇନଥିଲେ ।