ରାଜଧାନୀରେ ଦୋକାନ ସହ ଜଳିଗଲା ଟ୍ରକ, କଟକରେ ମୋ ବସରେ ଲାଗିଲା ନିଆଁ

ଭବନେଶ୍ବର/କଟକ: ଟ୍ବିନସିଟି କଟକ ଓ ଭୁବନେଶ୍ବରରେ ଦୁଇଟି ସ୍ଥାନରେ ଅଗ୍ନିକାଣ୍ଡ । ଗୋଟିଏ ସ୍ଥାନରେ ମୋ ବସ ଜଳି ଯାଇଥିବା ବେଳେ ଅନ୍ୟ ସ୍ଥାନରେ ଏକ ଦୋକାନ ଓ ମିନି ଟ୍ରକ ଜଳି ପାଉଁଶ ହୋଇଯାଇଛି ।

ଭୁବନେଶ୍ଵର ମଞ୍ଚେଶ୍ୱର ଥାନା ମହିନ୍ଦ୍ରା ଛକ ନିକଟରେ ଘଟିଛି ଅଗ୍ନିକାଣ୍ଡ । ଛକରେ ଥିବା ଏକ ଦୋକାନରେ ନିଆଁ ଲାଗି ଯାଇଥିଲା । ଚାହୁଁ ଚାହିଁ ନିଆଁ ଦୋକାନ ପାଖରେ ଥିବା ଏକ ମିନି ଟ୍ରକକୁ ବ୍ୟାପି ଯାଇଥିଲା । ସ୍ଥାନୀୟ ଲୋକେ ଟ୍ରକଟିକୁ ଦୋକାନ ନିକଟରୁ ଦୂରକୁ ପେଲି ପେଲି ନେବାକୁ ଚେଷ୍ଟା କରିଥିଲେ ମଧ୍ୟ ତାକୁ ନିଆଁ ଦାଉରୁ ରକ୍ଷା କରିପାରି ନଥିଲେ । ନିମିଷକ ମଧ୍ୟରେ ଉଭୟ ଦୋକାନ ଓ ଟ୍ରାକ ଜଳିପୋଡ଼ି ପାଉଁଶ ହୋଇଥିଲା । ଖବର ପାଇ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି ।

ସେହିପରି କଟକ ଲିଙ୍କ ରୋଡରେ ମୋ ବସରେ ନିଆଁ ଲାଗିଯାଇଥିଲା । ରାତି ପ୍ରାୟ ୮ଟାରୁ ସାଢେ ୮ଟା ଭିତରେ ଏହି ଅଗ୍ନିକାଣ୍ଡ ଘଟିଥିଲା । ବସଟି ଭୁବନେଶ୍ବରରୁ କଟକ ଆସୁଥିବା ବେଳେ ଲିଙ୍କରୋଡ୍ ନିକଟରେ ହଠାତ ଖରାପ ହୋଇଯାଇଥିଲା । ସବୁ ଚେଷ୍ଟା ପରେ ମଧ୍ୟ ବସ ଷ୍ଟାଟ ନହେବାରୁ ବସରେ ଥିବା ସମସ୍ତ ଯାତ୍ରୀଙ୍କୁ ତଳକୁ ଓହ୍ଲାଇ ଦିଆଯାଇଥିଲା । କିଛି ସମୟ ମଧ୍ୟରେ ବସକୁ ଟାଣି ଟାଣି ନେବାକୁ ବ୍ୟବସ୍ଥା ହେଉଥିବା ବେଳେ ହଠାତ ବସର ସାମ୍ନାପଟୁ ପ୍ରବଳ ଧୂଆଁ ବାହାରିଥିଲା । କର୍ମଚାରୀ ବସରେ ଥିବା ଅଗ୍ନି ନିର୍ବାପକ ଯନ୍ତ୍ରରେ ନିଆଁ ଆୟତ୍ତ କରିବାକୁ ଚେଷ୍ଟା କରିଥିଲେ ବିଫଳ ହୋଇଥିଲେ । ଚାହୁଁ ଚାହୁଁ ବସଟି ଜୋରରେ ଜଳିବାକୁ ଲାଗିଥିଲା । ଏନେଇ ଚାଉଳିଆଗଞ୍ଜ ଅଗ୍ନିଶମ ବିଭାଗକୁ ଖବର ଦେବା ପରେ କର୍ମଚାରୀ ଆସି ଏକ ଘଣ୍ଟାର କସରତ ପରେ ନିଆଁକୁ ଆୟତ୍ତ କରିଥିଲେ । ବସଟି ୮୦ ପ୍ରତିଶତରୁ ଊର୍ଦ୍ଧ୍ବ ଜଳି ଯାଇଛି । ତେବେ ନିଆଁ ଲାଗିବା ପୂର୍ବରୁ ଲୋକେ ଓହ୍ଲାଇ ପଡିଥିବାରୁ ଏକ ବଡ଼ ଅଘଟଣ ଟଳିଯାଇଛି ।