ଚକା ଜାମରୁ ଓହରିଲେ ଟିକାୟତ, ଦିଲ୍ଲୀ ନଆସିବାକୁ ଚାଷୀଙ୍କୁ ଦେଲେ ଆହ୍ୱାନ

ନୂଆଦିଲ୍ଲୀ: ୭୦ ଦିନରେ ଆନ୍ଦୋଳନ । ଅନେକ ବାଦ-ବିବାଦ ଏବଂ ବୈଠକ ପରେ ମଧ୍ୟ ସମାଧାନରେ ସମାପ୍ତି ଘଟିନାହିଁ । ସରକାରଙ୍କୁ କର୍ଣ୍ଣପାତ କରିବାକୁ ଅନେକ ପ୍ରଥା ଆପଣାଇବାରେ ଲାଗିଛନ୍ତି ଆନ୍ଦୋଳନରତ ଚାଷୀ । ନୂତନ କୃଷି ଆଇନ ପ୍ରତିବାଦରେ ଆସନ୍ତା କାଲି ଅର୍ଥାତ ଫେବୃଆରୀ ୬ରେ ରାଜଧାନୀ ଦିଲ୍ଲୀରେ ଚକା ଜାମର ଡାକରା ଦେଇଥିଲେ ଆନ୍ଦୋଳନରତ ଚାଷୀ ସଂଗଠନ । କିନ୍ତୁ ଏହି ନିଷ୍ପତିରୁ ହଠାତ ଓହରିଯାଇଛନ୍ତି ଭାରତୀୟ କିଷାନ ଯୁନିୟନ ସଂଗଠନର ରାଷ୍ଟ୍ରୀୟ ପ୍ରବକ୍ତା ତଥା ଚାଷୀ ନେତା ରାକେଶ ଟିକାୟତ ।

ଦିଲ୍ଲୀରେ ହେବାକୁ ଥିବା ଚକା ଜାମ ନିଷ୍ପତିରେ ପରିବର୍ତ୍ତନ କରିଛନ୍ତି ରାକେଶ ଟିକାୟତ । ଅନ୍ୟରାଜ୍ୟରୁ ଆସିବାକୁ ଥିବା ଚାଷୀ ଦିଲ୍ଲୀ ନଆସି, ନିଜ ନିଜ ରାଜ୍ୟରେ ଶାନ୍ତିପୂର୍ଣ୍ଣ ପ୍ରତିବାଦ କରିବାକୁ ଆହ୍ୱାନ କରିଛନ୍ତି ଚାଷୀ ନେତା ଟିକାୟତ । ଶନିବାର ସାରା ଦେଶରେ ଚକାଜାମ୍ କରିବା ପାଇଁ ଚାଷୀ ନିଷ୍ପତ୍ତି ନେଇଛନ୍ତି ସଙ୍ଗଠନ । ଅପରାହ୍ନ ୧୨ଟାରୁ ୩ଟା ପର୍ଯ୍ୟନ୍ତ ଏହି ଚକାଜାମ୍ ପ୍ରତିବାଦ କରିବାକୁ ନିର୍ଣ୍ଣୟ କରିଛନ୍ତି ଆନ୍ଦୋଳନରତ ସଂଗଠନ ।

ସେପଟେ ଶାନ୍ତିପୂର୍ଣ୍ଣ ଭାବେ ଚକାଜାମ୍ କରିବା ପାଇଁ ନିଷ୍ପତ୍ତି ନେଇଛନ୍ତି ଚାଷୀ ସଙ୍ଗଠନ । ତେବେ ଦିଲ୍ଲୀରେ ଚକାଜାମ୍ ହେବ ନାହିଁ ବୋଲି କହିଛନ୍ତି ଚାଷୀ ନେତା ରାକେଶ ଟିକାୟତ । ଅନ୍ୟ ରାଜ୍ୟରୁ ଯେପରି କୌଣସି ଚାଷୀ ଆନ୍ଦୋଳନସ୍ଥଳକୁ ଆସି ନ ପାରିବେ ସେଥି ପାଇଁ ସୀମାରେ ସମରସଜ୍ଜା କରିଛି ଦିଲ୍ଲୀ ପୋଲିସ । ୧୨ ଥାକିଆ ବ୍ୟାରିକେଡ୍ ବ୍ୟବସ୍ଥା କରିବା ସହ ଇଣ୍ଟରନେଟ୍ ସେବା ବନ୍ଦ କରିଛି ପ୍ରଶାସନ । ଅନ୍ୟପଟେ ବିରାଟ ଆନ୍ଦୋଳନର ଡାକରା ଦେଇଥିବା ରାକେଶ ଟିକାୟତ, ଦିଲ୍ଲୀ ଆନ୍ଦୋଳନକୁ ଶାନ୍ତିପୂର୍ଣ୍ଣ ଭାବରେ କରିବା ସହ ଅନ୍ୟ ରାଜ୍ୟର ଚାଷୀଙ୍କୁ ଦିଲ୍ଲୀ ନଆସିବାକୁ ଆହ୍ୱାନ କରିଛନ୍ତି ।