ଦିଲ୍ଲୀ ସୀମାରୁ ଘର ବାହୁଡ଼ୁଛନ୍ତି କୃଷକ
ନୂଆଦିଲ୍ଲୀ: ସଡ଼କରେ ତମ୍ବୁ ତଳେ ବର୍ଷେ । ଖରା, ବର୍ଷା ଓ ଶୀତରେ ଖୋଲା ଆକାଶରେ ବର୍ଷେ କାଟିଥିବା କୃଷକ ଆଜି ଘରକୁ ଫେରୁଛନ୍ତି । କେନ୍ଦ୍ର ସରକାର କୃଷି ଆଇନ୍ ପ୍ରତ୍ୟାହାର କରିବା ପରେ ଆନନ୍ଦ ଉଲ୍ଲାସରେ ଦିଲ୍ଲୀ ସୀମା ଛାଡ଼ିୁଛନ୍ତି ଅନ୍ନଦାତା । କୃଷକଙ୍କ ଏହି ବିଜୟକୁ ନେଇ ଆଜି ସାରା ଦେଶରେ ବିଜୟ ଉତ୍ସବ ପାଳନ ନେଇ ଘୋଷଣା କରାଯାଇଛି ।
ଦିଲ୍ଲୀରୁ ହରିୟାଣା, ପଞ୍ଜାବକୁ ଫେରୁଛନ୍ତି କୃଷକ । ଦିଲ୍ଲୀ ସୀମାର ସଡ଼କରେ ଲାଗିଥିବା ଅସ୍ଥାୟୀ ଟେଣ୍ଟ ଭଙ୍ଗା ଚାଲିଛି । ଟ୍ରାକ୍ଟରରେ ରାତି ବିତାଉଥିବା କୃଷକ ଏବେ ଘରମୁହାଁ ହୋଇଛନ୍ତି । କୃଷକ ଆନ୍ଦୋଳନ ପ୍ରତ୍ୟାହାର ଘୋଷଣା ସହ ୧୧ ଓ ୧୨ ତାରିଖରେ ଚାଷୀ ଘରକୁ ଫେରିବେ ନିଷ୍ପତ୍ତି ନେଇଥିଲେ । ଦିଲ୍ଲୀରୁ ଫେରୁଥିବା କୃଷକଙ୍କୁ ସ୍ୱାଗତ କରିବା ପାଇଁ ପଞ୍ଜାବ ସରକାର ନିଷ୍ପତ୍ତି ନେଇଛନ୍ତି ।
ନଭେମ୍ବର ୧୯ ତାରିଖରେ କେନ୍ଦ୍ର ସରକାର କୃଷି ଆଇନ୍ ପ୍ରତ୍ୟାହାର ପାଇଁ ଘୋଷଣା କରିଥିଲେ । ଏହା ପରେ ଏମଏସପିକୁ ଆଇନରେ ପରିଣତ କରିବା, ମୃତ ଚାଷୀଙ୍କ ପରିବାରକୁ ସହାୟତା, ବିଭିନ୍ନ ରାଜ୍ୟରେ ରୁଜୁ ହୋଇଥିବା ସମସ୍ତ ମାମଲା ପ୍ରତ୍ୟାହାର ପାଇଁ ସହମତି ପ୍ରକାଶ ପାଇବାରୁ ଆନ୍ଦୋଳନ ପ୍ରତ୍ୟାହାର କରିବା ପାଇଁ ନିଷ୍ପତ୍ତି ନେଇଥିଲେ ଚାଷୀ ସଙ୍ଗଠନ ।
