୨୯ ଯାଏଁ ଚାଷୀ ଆନ୍ଦୋଳନ ସ୍ଥଗିତ ରଖିବାକୁ ସଂଯୁକ୍ତ କିଶାନ ମୋର୍ଚ୍ଚାର ନିଷ୍ପତ୍ତି

ନୂଆଦିଲ୍ଲୀ: ଚାଷୀ ଆନ୍ଦୋଳନ ସ୍ଥଗିତ। ଆସନ୍ତା ୨୯ ତାରିଖ ଯାଏଁ ଆନ୍ଦୋଳନ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି ସଂଯୁକ୍ତ କିଶାନ ମୋର୍ଚ୍ଚା। ଏମଏସପି ଦାବି ନେଇ ଆନ୍ଦୋଳନ ଚଳାଇଥିବା କୃଷକ ସଂଗଠନ ଏହି ଘୋଷଣା କରିଛି। ଆସନ୍ତା ୨୯ ତାରିଖରେ ପରବର୍ତ୍ତୀ ପଦକ୍ଷେପ ନେଇ ନିଷ୍ପତ୍ତି ନିଆଯିବ। ହରିୟାଣାରେ ଲାଗି ରହିଛି ଉତ୍ତେଜନା। ଚାଷୀଙ୍କ ଉପରେ ପୁଣି ଲୁହବୁହା ଗ୍ଯାସ ସହ ଲାଠିମାଡ଼ କରିଛି ପୋଲିସ। ଖନୌରୀ ସୀମାକୁ ଯିବାକୁ ଚାଷୀ ଏକାଠି ହୋଇଥିବାବଳେ ପୋଲିସ ସେମାନଙ୍କୁ ଅଟକାଇଥିଲା। ଏହାକୁ ନେଇ ଚାଷୀ ଓ ପୋଲିସ ମଧ୍ୟରେ ମୁହାଁମୁହିଁ ସ୍ଥିତି ସୃଷ୍ଟି ହୋଇଥିଲା।

ଚାଷୀଙ୍କୁ ଘଉଡ଼ାଇବାକୁ ପୋଲିସ ଲୁହବୁହା ଗ୍ଯାସ୍ ମାଡ଼ କରିଥିଲା। ଏହାକୁ ନେଇ ପୋଲିସ-ଚାଷୀ ମଧ୍ଯରେ ସଂଘର୍ଷ ହେବାରୁ ପୋଲିସ ଲାଠିଚାର୍ଜ କରିଥିଲା। ଉତ୍ତେଜିତ ଚାଷୀ ପୋଲିସ ଉପରକୁ ପଥରମାଡ଼ କରିଥିଲେ। ହମଲାରେ ଅନେକ ପୋଲିସ କର୍ମୀଙ୍କ ସହ ଚାଷୀ ଆହତ ହୋଇଛନ୍ତି। ଅନେକ ଚାଷୀଙ୍କୁ ପୋଲିସ ଅଟକ ରଖିଛି। ଉଭୟ ପକ୍ଷରୁ ସ୍ଥିତି ଉତ୍ତେଜନାପୂର୍ଣ୍ଣ ରହିଛି। ସେପଟେ ଆନ୍ଦୋଳନରତ ଚାଷୀ ନେତାଙ୍କ ବିରୋଧରେ ହରିୟାଣା ପୋଲିସ ଜାତୀୟ ସୁରକ୍ଷା ନିରାପତ୍ତା ଆଇନ ବଳରେ କାର୍ଯ୍ୟାନୁଷ୍ଠାନ ନିଷ୍ପତ୍ତି ପ୍ରତ୍ଯାହାର କରିଛି।

ଅମ୍ବାଲା ପୋଲିସ ଗୁଳିରେ ମୃତ୍ଯୁ ହୋଇଥିବା ଚାଷୀ ଶୁଭକରଣଙ୍କ ମୃତ୍ୟୁକୁ ନେଇ ହରିୟାଣା ଗୃହମନ୍ତ୍ରୀଙ୍କ ବିରୋଧରେ ଏଫଆଇଆର କରିବାକୁ ଦାବି କରିଛନ୍ତି ଚାଷୀ। ଶୁଭକରଣଙ୍କୁ ସହିଦ ମାନ୍ଯତା ଦେବାକୁ ଚାଷୀ ଦାବି କରିଛନ୍ତି। ହରିୟାଣା ପୋଲିସ ବିରୋଧରେ ମାମଲା ରୁଜୁ କରିବାକୁ ଦାବି କରିଛନ୍ତି। ଖନୌରୀ ସୀମାରେ ପୋଲିସ ସହ ସଂଘର୍ଷ ଘଟି ଚାଷୀ ଶୁଭକରଣଙ୍କ ମୃତ୍ଯୁ ଘଟିଥିଲା। ଶୁଭକରଣଙ୍କ ମୃତ୍ଯୁକୁ ନେଇ ସଂଯୁକ୍ତ କିଶାନ ମୋର୍ଚ୍ଚା କଳାଦିବସ ପାଳନ କରିଛି। ସେପଟେ ଚାଷୀ ଆନ୍ଦୋଳନ ମାମଲା ଏବେ ସୁପ୍ରିମକୋର୍ଟରେ ପହଞ୍ଚିଛି।