କୃଷି ଆଇନ୍ ପ୍ରତ୍ୟାହାର ସହ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ଦାବିରେ ଚାଷୀ ସଂଗଠନର ପ୍ରତିବାଦ
ଭୁବନେଶ୍ୱର: କେନ୍ଦ୍ର ସରକାରଙ୍କ ୩ କୃଷି ଆଇନ୍ ଓ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ଦାବିରେ ଚାଷୀ ସଂଗଠନର ରେଳରୋକ । ଏହାର ପ୍ରଭାବ ଓଡ଼ିଶାର ବିଭିନ୍ନ ଜିଲ୍ଲାରେ ଦେଖିବାକୁ ମିଳିଛି । ଦିନ ୧୦ଟାରୁ ଅପରାହ୍ଣ ୪ଟା ଯାଏଁ ୬ ଘଣ୍ଟିଆ ରେଳରୋକ କରାଯାଇଛି । ଭାରତୀୟ କିଷାନ ୟୁନିଅନର ରେଳରୋକ ଡାକରାରେ ସାମିଲ୍ ହୋଇଛନ୍ତି ବହୁ ଚାଷୀ ସଂଗଠନ । ଭୁବନେଶ୍ୱରରୁ ବାଲେଶ୍ୱର ସବୁଠି ପ୍ରତିବାଦ କରିଛନ୍ତି ଚାଷୀ ।
ଫସଲର ସର୍ବନିମ୍ନ ସହାୟକ ମୂଲ୍ୟ ଦାବି ସହ ଲଖିମପୁର ଖିରି ଘଟଣାରେ କେନ୍ଦ୍ର ମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ଦାବି ହୋଇଛି । ବାଲେଶ୍ୱରରେ ଷ୍ଟେସନରେ ପ୍ରତିବାଦ କରିଛନ୍ତି ଚାଷୀ ସଂଗଠନ । ସେହିଭଳି ଜୟପୁରରେ ସଂଯୁକ୍ତ କୃଷକ ମୋର୍ଚ୍ଚା ପକ୍ଷରୁ ରେଳରୋକ କରାଯାଇଛି । ପେଟ୍ରୋଲ୍ ଡିଜେଲ ଦର ବୃଦ୍ଧି ସାଙ୍ଗକୁ ନିତ୍ୟ ବ୍ୟବହାର ଜିନିଷର ଆକାଶ ଛୁଆଁ ଦାମକୁ ବିରୋଧ କରି ଏଆଇକେଏସ୍ ପକ୍ଷରୁ ରେଳ ରୋକ କରାଯାଇଛି ।
ଗଜପତି ଜିଲ୍ଲା ସଂଯୁକ୍ତ କୃଷକ ମୋର୍ଚ୍ଚା ପକ୍ଷରୁ ପାରଳାଖେମୁଣ୍ଡି ରେଳ ଷ୍ଟେସନରେ ରେଳରୋକ କରାଯାଇଛି । ଖୋର୍ଦ୍ଧା ଜିଲ୍ଲାରେ ମଧ୍ୟ ରେଳରୋକ ହୋଇଛି । ନିରାକାରପୁର ଷ୍ଟେସନର ରେଳଧାରଣା ଉପରେ ବସି ରହି ରେଳରୋକ କରି ପ୍ରତିବାଦ କରିଛନ୍ତି ଚାଷୀ ସଂଗଠନ । ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ କଟକ ରେଲୱେ ଷ୍ଟେସନ ସମ୍ମୁଖରେ କେନ୍ଦ୍ର ସରକାରଙ୍କ କୃଷକ ବିରୋଧୀ ଆଇନ୍ ବିରୋଧରେ ପ୍ରତିବାଦ କରାଯାଇଛି । ଆନ୍ଦୋଳନକାରୀ ହାତରେ ପ୍ଲାଗ୍ କାର୍ଡ ଧରି ଷ୍ଟେସନ ସମ୍ମୁଖରେ ମୋଦି ସରକାରଙ୍କ ବିରୋଧରେ ନାରା ଦେଇଛନ୍ତି ।
