ସହଜ ହେଲା ଖରିଫ ଋତୁରେ ଋଣ ଯୋଗାଣ, ୯୦ ପ୍ରତିଶତ ଚାଷୀ ପାଇବେ ସୁଫଳ
ଭୁବନେଶ୍ୱର: ଚଳିତ ଖରିଫ ଋତୁ ପାଇଁ ଋଣ ଯୋଗାଣକୁ ମଧ୍ୟ ସହଜ କରାଯାଇଛି । ୫୦ ହଜାର ଟଙ୍କା ପର୍ଯ୍ୟନ୍ତ ଋଣ ବିନା ସୁଧରେ ଦିଆଯାଉଛି । ୫୦ ହଜାରରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣରେ ସୁଧରେ ହାର ମାତ୍ର ୨ ପ୍ରତିଶତ । ତେବେ ୯୦ ପ୍ରତିଶତ ଚାଷୀ ୫୦ ହଜାର ପର୍ଯ୍ୟନ୍ତ ଋଣ ନେଉଥିବାରୁ ରାଜ୍ୟର ବହୁ ସଂଖ୍ୟାରେ ଚାଷୀ ଏହାର ସୁଫଳ ପାଇବେ ବୋଲି କହିଛନ୍ତି ସମବାୟ ସଚିବ ବୀର ବିକ୍ରମ ଯାଦବ ।
ଚାଷୀଙ୍କୁ ଋଣ ପ୍ରଦାନର ଏକ ପରିସଂଖ୍ୟାନ ଦେଇ ସେ କହିଥିଲେ ଯେ, ୩୧ ମେ ସୁଦ୍ଧା ୨୬୪୯ କୋଟି ଟଙ୍କାର ଋଣ ଦିଆଯାଇଛି । ଗତ ବର୍ଷ ତୁଳନାରେ ଏହା ୧୧୭ ପ୍ରତିଶତ ଅଧିକ । ସେହିପରି ଗତ ବର୍ଷ ୩ ଲକ୍ଷ ୫ ହଜାର ଚାଷୀଙ୍କୁ କୃଷି ଋଣ ଦିଆଯାଇଥିଲା । ଏ ବର୍ଷ ୬ ଲକ୍ଷ ୧୯ ହଜାର ଚାଷୀଙ୍କୁ ଦିଆଯିବ କୃଷି ଋଣ । ରବି ଋତୁ ପାଇଁ ଫସଲ ସଂଗ୍ରହ ପ୍ରକ୍ରିୟା ଏବେ ବି ଜାରି ରହିଛି । ଏବେସୁଦ୍ଧା ୧୦ ଲକ୍ଷ ୯୧ ହଜାର ମେଟ୍ରିକ ଟନ ଧାନ ସଂଗ୍ରହ ସରିଛି ।
