ସୋଲାର ଲାଇଟ ଚୋରି ଅଭିଯୋଗରେ ଗ୍ରାମବାସୀ ଏବଂ ବନବିଭାଗ କର୍ମଚାରୀଙ୍କ ମାଡ଼ରେ ଦିବ୍ୟାଙ୍ଗ ଯୁବକଙ୍କ ମୃତ୍ୟୁ ଅଭିଯୋଗ । ପାଳଲହଡା ବନ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଧାରଣାରେ ବସିଲେ ମୃତକଙ୍କ ପରିବାର ଲୋକେ । ଅନୁଗୁଳ ଜିଲ୍ଲା ପାଳଲହଡା ସଇଡା ପଞ୍ଚାୟତ ଡ଼ଙ୍ଗାଧର ଗାଁରେ ହାତୀ ଗତିବିଧି ନିରୀକ୍ଷଣ ପାଇଁ ବନବିଭାଗ ପକ୍ଷରୁ ସୋଲାର ଲାଇଟ ଲଗାଯାଇଛି । ଡ଼ାଲ ଗାଁରେ ସମ୍ପର୍କୀୟ ମାମୁଁ ଘରେ ରହୁଥିବା ବିପିନ ଦାସ ନାମକ ଯୁବକ ଏହାକୁ ଚୋରି କରୁଥିଲା । ସେହି ସମୟରେ ଗ୍ରାମବାସୀ ତାଙ୍କୁ ନିସ୍ତୁକ ମାଡ ମାରିବା ସହ କାବୁ କରିଥିଲେ । ପରେ ପାଳଲହଡା ବନବିଭାଗକୁ ଜିମା ଦେଇଥିଲେ । ସେଠାରେ ତାଙ୍କୁ ନିସ୍ତୁକ ମାଡ ମରାଯାଇ ଗୁରୁତର ଆହତ କରିଥିଲେ । ପରେ ଯୁବକଙ୍କୁ ଏକ ଚୁକ୍ତିନାମା ଲେଖା କରି ପରିବାର ଲୋକଙ୍କୁ ଜିମା ଦେଇଥିଲେ ।
ଯୁବକଙ୍କୁ ଗୁରୁତର ଅବସ୍ଥାରେ ଦେଖି ଡାକ୍ତରଖାନା ନେବାକୁ ବନ ବିଭାଗକୁ ନିବେଦନ କରିଥିଲେ ପରିବାର ଲୋକ । ବନ ବିଭାଗ ନଶୁଣିବାରୁ ପରିବାର ଲୋକେ ଆମ୍ବୁଲାନ୍ସ ଯୋଗେ ପାଳଲହଡା ଉପଖଣ୍ଡ ଡାକ୍ତରଖାନରେ ଭର୍ତ୍ତି କରିଥିଲେ । ତାଙ୍କ ଅବସ୍ଥା ସଂକଟପନ୍ନ ହେବାରୁ ବିପିନଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ବିପିନର ଗତକାଲି ମୃତ୍ୟୁ ହୋଇଛି । ଆଜି ସକାଳୁ ନ୍ୟାୟ ଓ କ୍ଷତିପୂରଣ ଦାବିରେ ବନ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଧାରଣାରେ ବସିଛନ୍ତି ପରିବାର ଲୋକେ ।
