TRP Scam: ରିପବ୍ଲିକ ଦେଖିବାକୁ ମିଳୁଥିଲା ନିର୍ଦ୍ଦିଷ୍ଟ ରାଶି, ବିଶାଳ ଭଣ୍ଡାରୀଙ୍କ ଡାଏରୀରୁ ମିଳିଲା ପ୍ରମାଣ

ମୁମ୍ବାଇ: ଟିଆରପି ଠକେଇରେ ଖୋଲୁଛି ରିପବ୍ଲିକ ଟିଭିର ଗୁମର । ମୁମ୍ବାଇ ପୋଲିସ ତଦନ୍ତ ବେଳେ ହଂସା ରିସର୍ଚ୍ଚର ପୂର୍ବତନ କର୍ମଚାରୀ ବିଶାଳ ଭଣ୍ଡାରୀଙ୍କ ଡାଏରୀରୁ କେତକ ଖୁଲାସା କରିଛି । ଏହି ଡାଏରୀରେ କେତେଜଣଙ୍କ ନାଁ ଓ ଠିକଣା ଉଲ୍ଲେଖ ରହିଛି । ଡାଏରୀରେ ଉଲ୍ଲେଖ ବ୍ୟକ୍ତିଙ୍କୁ ପୋଲିସ ପଚାରଉଚରା କରିବା ପରେ ଜଣାପଡ଼ିଛି ରପବ୍ଲିକ ଟିଭି ଦେଖିବାକୁ ଲୋକଙ୍କୁ ମାସିକ ନିର୍ଦ୍ଦିଷ୍ଟ ପରିମାଣର ଟଙ୍କା ଦିଆଯାଉଥିଲା ।

ମୁମ୍ବାଇ ପୋଲିସର ପଚରାଉଚରା ବେଳେ କେତକ ପରିବାର କହିଛନ୍ତି- ରିପବ୍ଲିକ ଟିଭି ଦେଖିବା ପାଇଁ ବିଶାଳ ଭଣ୍ଡାରୀ ଆମକୁ ମାସିକ ଟଙ୍କା ଦେଉଥିଲେ । ବିଶାଳ ଭଣ୍ଡାରୀ ଓ କିଛି ପରିବାର ମଧ୍ୟରେ ହୋଇଥିବା ବାର୍ତ୍ତାଳାପ ମଧ୍ୟ ପୋଲିସ ହାତରେ ଲାଗିଛି । ଗୁରୁତ୍ୱପୂର୍ଣ୍ଣ କଥା ହେଉଛି ବିଶାଳ ଭଣ୍ଡାରୀ ଯେଉଁ ପରିବାରକୁ ଟଙ୍କା ଦେଇଥିଲେ, ସେହି ଘରୁ ହିଁ ରିପବ୍ଲିକ ଟିଭିର ଟିଆରପି ଅଧିକ ରହିଛି ।

ଟିଆରପି ସ୍କାମ୍ ମାମଲାରେ ଗିରଫ ହୋଇଥିବା ବିଶାଳ ଭଣ୍ଡାରୀ, ବୋମପଲ୍ଲୀ ରାଓ, ନାରାୟଣ ଶର୍ମା ଓ ଶୀର୍ଶ ସେଟ୍ଟୀ ଅକ୍ଟୋବର ୧୩ ଯାଏଁ ବିଚାର ବିଭାଗୀୟ ହାଜତରେ ରହିବେ । ଏହି ୪ ଜଣଙ୍କୁ ମୁମ୍ବାଇ ପୋଲିସ ପଚରାଉଚରା କରିବ ।

କେମିତି ହେଲା ଖୁଲାସା ?

ଅକ୍ଟୋବର ୫ରେ ଟିଆରପି ରାକେଟ ନେଇ ମୁମ୍ବାଇ ପୋଲିସରେ ଅଭିଯୋଗ ହୋଇଥିଲା । ଅଭିଯୋଗରେ ଦର୍ଶାଯାଇଥିଲା ବିଶାଳ ଭଣ୍ଡାରୀ ଓ ସଞ୍ଜୀବ ରାଓ ଲୋକଙ୍କୁ ଏକ ନିର୍ଦ୍ଦିଷ୍ଟ ଚ୍ୟାନେଲ ଦେଖିବା ପାଇଁ ଟଙ୍କା ଦେଉଛନ୍ତି । ଏପିଆଇ ସଚିନ ବେଜଙ୍କୁ ମଧ୍ୟ କିଛି ଟଙ୍କା ମିଳିଥିଲା । ଏହା ପରେ ମୁମ୍ବାଇ ପୋଲିସ ୫ ଓ ୬ ଅକ୍ଟୋବର ରାତିରେ ବିଶାଳ ଭଣ୍ଡାରୀଙ୍କୁ ଅଟକ ରଖି ଜେରା କରିଥିଲା ।

ବିଶାଳ ଭଣ୍ଡାରୀ ମୁମ୍ବାଇ ପୋଲିସକୁ କହିଛି- ତା’ ବିରୋଧରେ ତଦନ୍ତ ଚାଲିଥିବାରୁ ସେ ହଂସା ରିସର୍ଚ୍ଚ ଗ୍ରୁପ୍ ପ୍ରାଇଭେଟ୍ ଲିମିଟେଡ୍ କମ୍ପାନୀ ଛାଡ଼ି ଦେଇଛି । ହଂସା ହେଉଛି ବାର୍କ (BARC)ର ଏକ ସହଯୋଗୀ କମ୍ପାନୀ । ତାପରେ ପୋଲିସ ହଂସା କମ୍ପାନୀ ସହ କଥା ହୋଇଥିଲା ।

ଏହି ମାମଲାରେ ଖୋଦ୍ ହଂସା କମ୍ପାନୀ ତଦନ୍ତ କରିଥିଲା । ଯେଉଁଥିରେ ୫ଟି ପରିବାର ସହ କମ୍ପାନୀ କଥା ହୋଇଥିବା ବେଳେ ୪ଟି ପରିବାର ସବୁ କଥାକୁ ଅସ୍ୱୀକାର କରିଥିଲେ । ଆଉ ଗୋଟିଏ ପରିବାର କହିଥିଲା- ଚ୍ୟାନେଲ ଦେଖିବାକୁ ଟଙ୍କା ଦିଆଯାଉଛି । ଟଙ୍କା ମିଳୁଥିବା ମାନିଥିବା ମହିଳାଙ୍କ ଘରେ ଏୟାରଟେଲ୍ ଡିଟୁଏଚ୍ କନେକ୍ସନ ରହିଛି ।

କଣ କହିଲେ ସାକ୍ଷୀ

ତଦନ୍ତ ବେଳେ ଜଣେ ସାକ୍ଷୀ କହିଥିଲେ- ତାଙ୍କ ଘରେ ଏକ ବୈରୋମିଟର ଲାଗିଛି । ଯେଁଉଥିପାଇଁ ତାଙ୍କୁ ପ୍ରତି ମାସରେ ୪୮୩ ଟଙ୍କା ମିଳୁଛି । ସାକ୍ଷୀଙ୍କ ବୟାନ ମୁତାବକ- ୨୦୨୦ ଜାନୁଆରୀରେ ଅଭିଯୁକ୍ତ ବିଶାଲ ଓ ଦିନେଶ ବିଶ୍ୱକର୍ମା ଘରକୁ ଆସିଥିଲେ । ଉଭୟ ମୋତେ ପଚାରିଥିଲେ ରିପବ୍ଲିକ ଟିଭି ଦେଖୁଛ କି ? ମୋତେ ରିପବ୍ଲିକ ଟିଭି ପସନ୍ଦ ନୁହେଁ ବୋଲି କହିଥିଲି । ତାପରେ ଦୁହେଁ କହିଥିଲେ ରପବ୍ଲିକ ଟିଭି ଦେଖିଲେ ଓ ଲଗାଇ ରଖିଲେ ତାଙ୍କୁ ମାସିକ ୪୮୩ ଟଙ୍କା ଦିଆଯିବ ।

ରିପବ୍ଲିକ ଟିଭିର ସ୍ପଷ୍ଟୀକରଣ

ଅଭିଯୋଗକୁ ମିଥ୍ୟା କହିବା ସହ ରିପବ୍ଲିକ ଟିଭି କହିଛି ମୁମ୍ବାଇ ପୋଲିସ କମିଶନରଙ୍କ ବିରୋଧରେ ମାନହାନି ମକଦ୍ଦମା କରାଯିବ । ରିପବ୍ଲିକ ଅନୁଯାୟୀ- ପାଲଘର ଓ ସୁଶାନ୍ତ ସିଂହ ରାଜପୁତ ମାମଲାରେ ଚ୍ୟାନେଲ କରିଥିବା ପ୍ରସାରଣ ବିରୋଧରେ ଏଭଳି ଅଭିଯୋଗ କରାଯାଉଛି । ଚ୍ୟାନେଲ ମୁତାବକ ବାର୍କ ଅଭିଯୋଗରେ ରିପବ୍ଲିକ ଟିଭିର ନାମ ହିଁ ନାହିଁ ।