ଆଜିଠୁ ୫ ଦିନିଆ ରିମାଣ୍ଡରେ ଯିବେ ରସିକିଆ ନକଲି ଡାକ୍ତର
ଭୁବନେଶ୍ୱର: ଆଜିଠୁ ରିମାଣ୍ଡରେ ଯିବେ ରସିକିଆ ନକଲି ଡାକ୍ତର ରମେଶ ସ୍ୱାଇଁ । ୫ ଦିନ ରିମାଣ୍ଡ ପାଇଁ ଅନୁମତି ଦେଇଛନ୍ତି ଭୁବନେଶ୍ବର ଏସଡିଜେଏମ କୋର୍ଟ । ରମେଶଙ୍କୁ ୭ ଦିନ ରିମାଣ୍ଡରେ ନେବାକୁ ଆବେଦନ କରିଥିଲା ମହିଳା ଥାନା । ଠକ ରମେଶର ୩୦ ବର୍ଷର ଇତିହାସ ଖୋଜିବ ପୋଲିସ୍ । ରମେଶଙ୍କ ବାବଦରେ ଯେଉଁ ସବୁ ତଥ୍ୟ ମିଳିଛି, ସେ ସବୁ ଠିକଣା, ରାଜ୍ୟ ତଥା ରାଜ୍ୟ ବାହାରକୁ ଯାଇ ଖୋଳତାଡ କରିବ ପୋଲିସ୍ । ମୋବାଇଲରେ ପତ୍ନୀଙ୍କ ନାମ କୋଡ ଓ୍ବାର୍ଡରେ ସେଭ୍ କରୁଥିଲେ ରମେଶ । ଏବେ ସୁଦ୍ଧା ଠକେଇର ଶିକାର ହୋଇଥିବା ଉଭୟ ପୁରୁଷ ଓ ମହିଳାଙ୍କୁ ଯୋଗାଯୋଗ କଲାଣି ସ୍ୱତନ୍ତ୍ର ଟିମ୍ ।
ନକଲି ଡାକ୍ତର ରମେଶ ସ୍ୱାଇଁ ପତ୍ନୀଙ୍କର ନମ୍ବରକୁ ୱାଇଫ ୱାନ୍, ୱାଇଫ୍ ଆଡଭୋକେଟ, ୱାଇଫ୍ ଟିଚର, ୱାଇଫ୍ ଡକ୍ଟର, ୱାଇଫ୍ ପୋଲିସ୍ ବୋଲି ସେଭ୍ କରିଥିଲା । ଲାଇନରେ ଥିବା ମହିଳାଙ୍କୁ ଟୁ ବି ୱାଇଫ ଜିଲ୍ଲା ନାମରେ ସେଭ୍ କରିଥିଲେ । ରମେଶ ୧୯୮୨ ଠାରୁ ୨୦୧୮ ପର୍ଯ୍ୟନ୍ତ କ’ଣ କରୁଥିଲା ପୂରା ବାୟୋଡାଟା ଖୋଜୁଛି ପୋଲିସ । ସେପଟେ ରମେଶ ବିରୋଧରେ ରାଜ୍ୟ ବାହାରେ ମଧ୍ୟ ଠକେଇ ସଂଖ୍ୟା ବଢିବାରେ ଲାଗିଛି । ଭୁବନେଶ୍ବର ସତ୍ୟ ବିହାର ଅଞ୍ଚଳର ଜଣେ ବିଲଡରଙ୍କଠାରୁ ୨୫ ଲକ୍ଷ ଟଙ୍କା ଠକିଥିବା ପୋଲିସ ଜାଣିବାକୁ ପାଇଛି । କେନ୍ଦ୍ରାପଡାର ଜଣେ ଲୋକଙ୍କୁ ତହସିଲଦାର କହି ୫ ଲକ୍ଷ ଟଙ୍କା ଚୂନ ଲଗାଇଛି । ସେହିପରି ଜଗତସିଂହପୁର, କଟକ, ଢେଙ୍କାନାଳ, ବଡମ୍ବା ପରେ ବୌଦ୍ଧରୁ ମଧ୍ୟ ଆସିଛି ଠକେଇ ଅଭିଯୋଗ । ବୌଦ୍ଧ ବାଉଁଶୁଣି ଥାନା ମଙ୍ଗଳାମୁଣ୍ଡାର ପ୍ରକାଶ ସ୍ୱାଇଁଙ୍କ ଭଉଣୀଙ୍କୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟରେ ଷ୍ଟାଫ୍ ନର୍ସ ଚାକିରି କରାଇ ଦେବାକୁ କହି ୪ ଲକ୍ଷ ଟଙ୍କା ଠକିଥିବା ଅଭିଯୋଗ ହୋଇଛି । ରିମାଣ୍ଡରେ ଆସିଲା ପରେ ବ୍ୟାଙ୍କ ଟ୍ରାଞ୍ଜାକ୍ସନ ଓ ଠକେଇର ନେଟୱର୍କର ଛାନଭିନ କରିବ ପୋଲିସ । କେବଳ ସେତିକି ନୁହେଁ ଅନେକ ଲୋକଙ୍କୁ କିଡନୀ ମଧ୍ୟ ଅପରେସନ କରିଥିବା ପୋଲିସ ସୂଚନା ପାଇଛି ପୋଲିସ୍ ।
