ଡାକ୍ତର ପରିଚୟ ଦେଇ ଠକିନେଲେ ଆକ୍ବାଗାର୍ଡ ଓ ଏଲଇଡି

ଭୁବନେଶ୍ୱର: ରାଜଧାନୀରେ ମାତିଛି ସାତିର୍ ଚୋର। ନିଜକୁ ଡାକ୍ତରର ପରିଚୟ ଦେଇ ମିଛ ପେମେଣ୍ଟ ଦେଖାଇ ୨ଜଣ ଦୋକାନୀଙ୍କୁ ଠକି ଗୋଟେ ଆକ୍ବାଗାର୍ଡ ଓ ଗୋଟିଏ ଏଲଇଡି ଠକି ନେଇଛି ନକଲି ଡାକ୍ତର । ନାଁ କହୁଥିଲା ଡକ୍ଟର ବିକାଶ, ପିନ୍ଧିଥିଲା ସୁନା । ଲୁକ୍ସ ଓ ନାଁ ଚକ୍କରରେ ଅତି ସହଜରେ ଚୁନା ଲଗେଇ ଜିନିଷ ନେଇ ଚମ୍ପଟ ମାରିଛି ଏହି ଠକ । ଯାହାର ଏକ୍ସକ୍ଲୁସିଭ୍ ଭିଜୁଆଲ ଆପଣ ଦେଖୁଛନ୍ତି ।

ଚନ୍ଦ୍ରଶେଖରପୁରରେ ଥିବା ଏକ ୱାଟର ପ୍ୟୁରିଫାଏର ଦୋକାନକୁ ଆସିଥିଲେ ଜଣେ ଠକ ।  ନିଜକୁ ଡାକ୍ତର ବିକାଶ ବୋଲି ପରିଚୟ ଦେଇ water purifier କିଣିଲେ । ଟଙ୍କା ଦେଲା ବେଳକୁ କହିଲେ ଫୋନ୍ ପେ କରିବି । ସ୍କାନ କଲେ ସବୁ ଫେଲ୍ ଦେଖାଇବା ପରେ ଦୋକାନ ମାଲିକଙ୍କୁ କହିଲେ ଆକାଉଣ୍ଟରେ ସିଧା ପଠାଉଛି । ଦୋକାନରେ ଭିଡ଼ ଥିବା ବେଳେ ଟଙ୍କା ପଠାଇ ଦେଇଛି କହି ଖସି ପଳାଇଥିଲା ଠକ।

ସେପଟେ ଦୋକାନ ମାଲିକ ଆକାଉଣ୍ଟ ଦେଖିଲା ବେଳକୁ ଟଙ୍କା ଆସିନି । ପଛେ ପଛେ ଜଣେ ଉବର ଡ୍ରାଇଭର ସେହି ଦୋକାନକୁ ଆସି ଠକ ଡାକ୍ତରକୁ ଖୋଜିଥିଲେ। ତାଙ୍କ ଟଙ୍କା ନଦେଇ ଅନ୍ୟ ଗାଡ଼ିରେ ଜିନିଷ ଲୋଡ୍ କରି ଚମ୍ପଟ ମାରିଥିବା ସେ କହିଥିଲେ। ଆଉ ଏକ ଏଲଇଡି ଦୋକାନରେ ମଧ୍ୟ ଏଲଇଡ଼ି କିଣି ସମାନ ତରିକାରେ ଠକିଛି ଠକ ଡାକ୍ତର। ସେ ନିଜ ଠିକଣା ମୋବାଇଲ ନମ୍ବର ସବୁ ଭୁଲ୍ ଦେଇଥିବା ସୂଚନା ।