ଫେସବୁକର ନୂଆ ନାଁ ‘ମେଟା’

ନୂଆଦିଲ୍ଲୀ: ବିଶ୍ବର ସବୁଠୁ ବଡ଼ ସାମାଜିକ ଗଣମାଧ୍ୟମ ଫେସବୁକ ପାଇଲା ନୂଆ ପରିଚୟ। ଫେସବୁକର ନାଁ ବଦଳାଇଛି କମ୍ପାନୀ। ଏବେ ନୂଆ ନାଁ ରଖାଯାଇଛି ‘ମେଟା’। କମ୍ପାନୀର ବାର୍ଷିକ ଉତ୍ସବରେ ନୂଆ ନାଁ ଘୋଷଣା କରିଛନ୍ତି ପ୍ରତିଷ୍ଠାତା ମାର୍କ ଜୁକରବର୍ଗ। ଗତ କିଛିଦିନ ଧରି ଫେସବୁକର ନାମ ପରିବର୍ତ୍ତନ ନେଇ ଚର୍ଚ୍ଚା ହୋଇଆସୁଥିଲା।

ଆଗାମୀ କିଛି ବର୍ଷ ମଧ୍ୟରେ କମ୍ପାନୀ ଏହାକୁ ମେଟାଭର୍ସରେ ପରିଣତ କରିବାକୁ ଯୋଜନା ରଖିଛି। ଫେସବୁକ୍ ଇଣ୍ଟରନେଟ ଜଗତର ନୂଆ ଅବତାର ହେବ ବୋଲି ଜୁକରବର୍ଗ ନିକଟରେ ଦେଇଥିବା ଏକ ସାକ୍ଷାତକାରରେ କହିଥିଲେ । ଫେସବୁକର ପୂର୍ବତନ ଇଣ୍ଟିଗ୍ରିଟି ଚିଫ୍ ସମିଦ୍ଧ ଚକ୍ରବର୍ତ୍ତୀ ଏହି ନାମ ପ୍ରସ୍ତାବ ଦେଇଥିଲେ । ଏ ନେଇ ଆସନ୍ତା ୫ବର୍ଷ ମଧ୍ୟରେ ୧୦ହଜାର ନିଯୁକ୍ତି ବାହାର କରିବାକୁ ଯୋଜନା କରାଯାଇଛି।

ଫେସବୁକର ନୂଆ ଭବିଷ୍ୟତ ‘ମେଟାଭର୍ସ’ ଗଢ଼ିବା ପାଇଁ ଏମାନଙ୍କ ସହଯୋଗ ନିଆଯିବ । ଫେସବୁକକୁ ନେଇ ନିକଟରେ ଅନେକ ଅଭିଯୋଗ ଆସିଥିବା ବେଳେ ୟୁଜର୍ସଙ୍କ ତଥ୍ୟ ସୁରକ୍ଷିତ ରଖାଯାଉ ନଥିବା ଅଭିଯୋଗ ଆସିଥିଲା । ଫେସବୁକର ଜଣେ କର୍ମଚାରୀ ମଧ୍ୟ କମ୍ପାନୀର କିଛି ଗୁରୁତ୍ବପୂର୍ଣ୍ଣ ଡାଟା ଲିକ୍ କରିଥିଲେ । ଏସବୁକୁ ଦୃଷ୍ଟିରେ ରଖି କମ୍ପାନୀ ଫେସବୁକର ନାଁ ବଦଳାଇଛି ବୋଲି କୁହାଯାଉଛି ।