କର୍ମଚାରୀଙ୍କ ମଦ ନିଶା, ତଦନ୍ତ ପରେ କାର୍ଯ୍ୟାନୁଷ୍ଠାନ କହିଲେ ଅବକାରୀ କମିଶନର

ସମ୍ବଲପୁର/କଟକ: ଡ୍ୟୁଟି ଅଛି, ଦେହରେ ୟୁନିଫର୍ମ ଡ୍ରେସ୍ ଅଛି । ହେଲେ, ଅବକାରୀ କର୍ମଚାରୀଙ୍କ ନିଶା ଉତୁରୁନି । ଗଞ୍ଜେଇ ବ୍ୟବସାୟୀଙ୍କୁ ରେଡ୍ ପରେ କିଏ କେତେ ଟଙ୍କା ପାଇବ ଖୋଲାଖୋଲି ଆଲୋଚନା କରୁଛନ୍ତି ଅବକାରୀ ବିଭାଗର କର୍ମଚାରୀ । ଏଭଳି ଏକ ଭିଡିଓ ଭାଇରାଲ ହେବାରେ ଲାଗିଛି । ଭାଇରାଲ୍ ଭିଡିଓରେ ୩ରୁ ୪ ଜଣ ଅବକାରୀ କର୍ମଚାରୀ ଡ୍ରେସରେ ଥିବା ଦେଖାଯାଉଛି । ଗଞ୍ଜେଇ ବ୍ୟବସାୟୀଙ୍କଠାରୁ ଟଙ୍କା ଆଦାୟ ନେଇ କଥା ହେଉଛନ୍ତି କର୍ମଚାରୀ ।

ଭାଇରାଲ ଭିଡିଓଟି ନନ୍ଦିଘୋଷ ଟିଭିରେ ପ୍ରସାରଣ ପରେ ଆକ୍ସନ ମୋଡକୁ ଆସିଛନ୍ତି ଅବକାରୀ କମିଶନର ଅଞ୍ଜନ କୁମାର ମାଣିକ । ସେ ଘଟଣାର ତଦନ୍ତ ନିର୍ଦ୍ଦେଶ ଦେବା ସହ ରିପୋର୍ଟ ଆଧାରରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି । ତେବେ, ଡ୍ୟୁଟିରେ ଥିବା ବେଳେ ସରକାରୀ ଗାଡ଼ିରେ ବସି ଅବକାରୀ ବିଭାଗ କର୍ମଚାରୀ କିପରି ମଦ ପିଇଲେ । ଭାଇରାଲ୍ ଭିଡିଓରେ ଥିବା କୌଣସି କର୍ମଚାରୀଙ୍କ ପ୍ରତିକ୍ରିୟା ମିଳିପାରିନାହିଁ ।