ପରିବେଶ ସୁରକ୍ଷା ଚିନ୍ତା: ୫ ବର୍ଷ ହେଲା ହେନ୍ତାଳ ବଣ ସୃଷ୍ଟିରେ ଲାଗିଛନ୍ତି କ୍ଲବ ପିଲା

ପାରାଦୀପ: ଜନସଂଖ୍ଯା ବୃଦ୍ଧି ସହ ବଢୁଛି ଗାଡ଼ି ମୋଟର । ଆଧୁନିକତାର ସ୍ପର୍ଶରେ ଧ୍ବଂସ ହେଉଛି ଜଙ୍ଗଲ । ନଷ୍ଟ ହେଉଛି ପରିବେଷ, ପ୍ରଭାବିତ ହେଉଛି ଋତୁଚକ୍ର । ପରିବେଷ ପ୍ରଦୂଷଣ ଓ ଜଙ୍ଗଲ ଅଭାବରୁ ବୃଦ୍ଧି ପାଉଛି ପ୍ରାକୃତିକ ବିପର୍ଯ୍ଯୟ । ପ୍ରବଳ ଖରା ଓ ଗୁଳୁଗୁଳିରେ ଆକ୍ତାମାକ୍ତା ଜନଜୀବନ । ବନ୍ଦର ନଗରୀ ପାରାଦୀପରେ ମଧ୍ଯ ଦେଖିବାକୁ ମିଳିଛି ଏହାର ପ୍ରଭାବ । ଦିନେ ଉପକୂଳର ରକ୍ଷା କବଚ ସାଜିଥିଲା ଏଠାକାର ହେନ୍ତାଳ ବଣ । ଏବେ ସେହି ସ୍ଥାନରେ ଠିଆ ହୋଇଛି ସୁଉଚ୍ଚ ଅଟ୍ଟାଳିକା ଓ ବଡ଼ବଡ଼ କଳକାରଖାନା । ଫଳରେ ଉପକୂଳ ଅଞ୍ଚଳରେ ବଢୁଛି ଭୟ । ତେବେ ପରିବେଶ ସନ୍ତୁଳନ ପାଇଁ ଅଣ୍ଟା ଭିଡ଼ିଛି ନୀଳଚକ୍ର ୟୁଥ କ୍ଲବ । ୫ ବର୍ଷ ହେଲା ମହାନଦୀ, କାଉଡିଆ ନଦୀ ଓ ସମୁଦ୍ର କୂଳରେ ହେନ୍ତାଳ ଜଙ୍ଗଲ ସୃଷ୍ଟି ପାଇଁ ଚଲାଇଛି ପ୍ରୟାସ । ସ୍ଥାନୀୟ ମହିଳା, ଛାତ୍ରଛାତ୍ରୀଙ୍କୁ ଏହି ଅଭିଯାନରେ କରାଯାଉଛି ସାମିଲ ।

ମୁଖ୍ୟତଃ ରାଇ, ଗରଣୀ, ସୁନ୍ଦରୀ, ଶିଶୁମର, ଗୁଆଁ, ସିନ୍ଦୁକା, ହେନ୍ତାଳ, ସିଙ୍ଗାଳବହ୍ନୀ, ବଣଗୁଆ, ପିତାମାରି, ଲଟି ସୁନ୍ଦରୀ, ବହ୍ନୀ, ହରକଞ୍ଚ, ରୁଆ, ହବାଳି, ଗେରୁଆ, ଧଅ, ଢମଣା ପ୍ରଭୃତି ୨୬ ପ୍ରଜାତିର ଗଛ ଓ ଲତା ସମିଶ୍ରିତ ହେଉଛି ଲୁଣା ଜଙ୍ଗଲ । ମୃତ୍ତିକା କ୍ଷୟକୁ ରୋକିବା ସହ ଜଳଜୀବଙ୍କ ପ୍ରଜନନ ସ୍ଥଳୀ । ଏହା ଅନ୍ୟ ଗଛ ତୁଳନାରେ ଦିନ ଏବଂ ରାତିରେ ମଧ୍ଯ ୮୦ ଭାଗ ଅଧିକ ଅମ୍ଳଜାନ ପ୍ରଦାନ କରେ । ଏହି ଜଙ୍ଗଲ ଧ୍ବଂସ ହେବା ଦ୍ବାରା ଜୀବଚକ୍ର ଓ ଋତୁଚକ୍ର ପ୍ରଭାବିତ ହେଉଛି ।

ଏବେ ପାରାଦୀପର ଅଠରବାଙ୍କୀଠାରୁ ନେହେରୁ ବଙ୍ଗଳା ଯିବା ରାସ୍ତାର ବାମ ପଟ କାଉଡିଆ ନଦୀରେ ୫ କିଲୋମିଟର ପର୍ଯ୍ୟନ୍ତ ହେନ୍ତାଳ ଜଙ୍ଗଲ ଦେଖିବାକୁ ମିଳୁଛି । ଏହାକୁ ବୃଦ୍ଧି କରିବା ପାଇଁ କ୍ଲବ ପକ୍ଷରୁ ପ୍ରୟାସ କରାଯାଉଛି । କ୍ଲବର ଏହି ପ୍ରୟାସକୁ ବିଭିନ୍ନ ମହଲରୁ ପ୍ରଶଂସା କରାଯାଉଛି ।