୨୨ତମ ଏଣ୍ଟରପ୍ରାଇଜ୍ ଓଡ଼ିଶା-୨୦୧୯ ଉଦଘାଟିତ, ମୁଖ୍ୟମନ୍ତ୍ରୀ କହିଲେ…

ଭୁବନେଶ୍ୱର : ଶିଳ୍ପ କ୍ଷେତ୍ରରେ ଆଗକୁ ବଢୁଛି ଓଡ଼ିଶା । ରାଜ୍ୟ ସରକାରଙ୍କ ୫-ଟି ମାଧ୍ୟମରେ ବ୍ୟବସାୟ ଉପଯୋଗୀ ପରିବେଶ ସୃଷ୍ଟି କରାଯାଉଛି । ରାଜ୍ୟରେ ନିଯୁକ୍ତିର ସୁଯୋଗ ସୃଷ୍ଟି ସହ ଅର୍ଥନୀତିକ ଅଭିବୃଦ୍ଧିର ବାତାବରଣ ମଧ୍ୟ ପ୍ରସ୍ତୁତ କରାଯାଉଛି । ସିଆଇଇ ପକ୍ଷରୁ ଭୁବନେଶ୍ୱରରେ ୨୨ ତମ ଏଣ୍ଟରପ୍ରାଇଜ୍ ଓଡ଼ିଶା ୨୦୧୯ ଉଦଘାଟନ ଅବସରରେ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଇଜ୍ ଅଫ୍ ଡୁଇଙ୍ଗ୍ ବିଜନେସରେ ଓଡ଼ିଶା ବେଶ୍ ଭଲ କରୁଛି । ରାଜ୍ୟର ଯେଉଁ ସବୁ ଜିଲ୍ଲାରେ ଶିଳ୍ପର ଏତେଟା ଅଭିବୃଦ୍ଧି ହୋଇପାରିନାହିଁ ସେ ସବୁ ଜିଲ୍ଲାରେ ଶିଳ୍ପ ଭିତ୍ତିଭୂମି ବିକାଶ ଦିଗରେ ସରକାର ଗୁରୁତ୍ୱ ଦେଉଥିବା ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ଷ୍ଟାଟ୍ ଅପ୍ କ୍ଷେତ୍ରରେ ଓଡ଼ିଶାର ପ୍ରଦର୍ଶନ ମଧ୍ୟ ବେଶ୍ ଭଲ ରହିଛି । ୨୦୨୦ ସୁଦ୍ଧା ଏହା ଷ୍ଟାଟ୍ ଅପ୍ ହବ୍ ଭାବେ ପରିଗଣିତ ହେବ । ଗୋ ସ୍ୱିଫ୍ଟ ପୋର୍ଟାଲ୍ ମାଧ୍ୟମରେ ବିଭିନ୍ନ ଶିଳ୍ପ ସଂସ୍ଥା ଉପକୃତ ହୋଇପାରୁଛନ୍ତି । ୨୦୧୮ର ମେକ୍ ଇନ୍ ଓଡ଼ିଶା ଏକ ବିରାଟ ସଫଳତା ପାଇଥିବା ମୁଖ୍ୟମନ୍ତ୍ରୀ କହିଛନ୍ତି । ଏଥିରେ ୫୧ ହଜାରରୁ ଅଧିକ ଡେଲିଗେଟ୍ ଅଂଶଗ୍ରହଣ କରିଥିଲେ । ସରକାରଙ୍କ ଭିଜନ୍ ୨୦୨୫ ମଧ୍ୟରେ ୨ ଲକ୍ଷ ୫୦ ହଜାର କୋଟିର ନୂଆ ନିବେଶ ଏବଂ ୩୦ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରିବାକୁ ଲକ୍ଷ୍ୟ ରଖାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ ।

ଇଡ଼କୋ ପ୍ରଦର୍ଶନୀ ପଡିଆରେ ୪ ଦିନ ଧରି ଚାଲିବ ଏହି କାର୍ଯ୍ୟକ୍ରମ । କାର୍ଯ୍ୟକ୍ରମରେ ଏମଏସଏମଇ ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ଉପସ୍ଥିତ ଥିଲେ । ')}