୩ ଘର ଭାଙ୍ଗିଲେ ୧୫ ଟିକିଆ ହାତୀପଲ, ଲୋକେ ଆତଙ୍କିତ
କେନ୍ଦୁଝର: କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଜ ଯୋଡ଼ା ସେକ୍ସନରେ ହାତୀ ଆତଙ୍କ । ଗୋଟିଏ ପଟେ ଜଙ୍ଗଲ ଜଳୁଥିବା ବେଳେ ବନ୍ୟଜନ୍ତୁ ଜନବସତି ମୁହାଁ ହେବାରେ ଲାଗିଛନ୍ତି । ଗୁରୁବେଡ଼ା ବୈତରଣୀ ସଂରକ୍ଷିତ ଜଙ୍ଗଲ ନିକଟରେ ୧୫ ଟିକିଆ ହାତୀପଲ ବୁଲୁଛନ୍ତି । ଏହି ହାତୀପଲ ଶୁକ୍ରବାର ଅପରାହ୍ଣରେ କ୍ରେଚ୍ ହଟିଂ ନିକଟରେ ୩ଟି ଘର ଭାଙ୍ଗି ଦେଇଛନ୍ତି ।
ହାତୀପଲଙ୍କୁ ନେଇ ଲୋକେ ଆତଙ୍କିତ ହୋଇ ପଡ଼ିଥିବା ବେଳେ ସନ୍ଧ୍ୟା ହେଲେ ଘରୁ ବାହାରିବାକୁ ଡରୁଛନ୍ତି । ସୂଚନା ଅନୁଯାୟୀ, ଅନ୍ୟ ଜଙ୍ଗଲରେ ନିଆଁ ଲାଗିଥିବା କାରଣରୁ ବୈତରଣୀ ସଂରକ୍ଷିତ ଜଙ୍ଗଲ ଅଞ୍ଚଳରେ ହାତୀପଲ ଗତ ଦେଢ଼ ମାସ ହେଲା ଅଛନ୍ତି ।
ବୈତରଣୀ ନଦୀକୂଳ ଅଞ୍ଚଳରେ ହାତୀ ମାନଙ୍କୁ ପର୍ଯ୍ୟାପ୍ତ ଖାଦ୍ୟ ଓ ପାଣି ମିଳୁଥିବାରୁ ହାତୀମାନେ ଏଠାରେ ଚଳପ୍ରଚଳ କରୁଛନ୍ତି । ବନ ବିଭାଗ ହାତୀପଲଙ୍କୁ ସୁରକ୍ଷିତ ସ୍ଥାନକୁ ଘଉଡ଼ାଇବାକୁ ଉଦ୍ୟମ ଜାରି ରଖିଛି ।
