ହାତୀ ଉତ୍ପାତ: ରାତି ହେଲେ ଗାଁ ମୁହାଁ ହେଉଛନ୍ତି ହାତୀ ପଲ

ଟାଙ୍ଗୀ: ଖୋର୍ଦ୍ଧା ବନଖଣ୍ଡ ଟାଙ୍ଗୀ ରେଞ୍ଜରେ ଜଙ୍ଗଲୀ ହାତୀ ଉତ୍ପାତ । ଦିନ ବେଳା ହାତୀପଲ ଜଙ୍ଗଲରେ ରହୁଥିବା ବେଳେ ରାତି ହେଲେ ଖାଦ୍ୟ ଲୋଭରେ ଗାଁ ମୁହାଁ ହେଉଛନ୍ତି ଜଙ୍ଗଲୀ ହାତୀ । ହାତୀ ପଲଙ୍କ ଉପଦ୍ରବ ଯୋଗୁଁ ଲୋକେ ଆତଙ୍କିତ ହେଉଛନ୍ତି । ଗତକାଲି ରାତିରେ ଟାଙ୍ଗୀ ବନାଞ୍ଚଳରୁ ୨ଟି ହାତୀପଲ ବାହାରି ୧୬ନମ୍ବର ଜାତୀୟ ରାଜପଥ ଚମ୍ପାଗଡ଼ ନିକଟ ଓସକେଇ ଖୋଲ ଛକରେ ମଚାଇଥିଲେ ଆତଙ୍କରାଜ । ଫଳରେ ରାସ୍ତାରେ ଗାଡ଼ି ମୋଟର ଚଳାଚଳ ବନ୍ଦ ହୋଇଯାଇଥିଲା । ଖବର ପାଇ ଟାଙ୍ଗୀ ବନ ବିଭାଗ କର୍ମଚାରୀ ମାନେ ଘଟଣା ସ୍ଥଳରେ ପହଞ୍ଚି ଦନ୍ତା ୨ଟିକୁ ଜଙ୍ଗଲ ମଧ୍ୟକୁ ଘଉଡ଼ାଇ ଦେଇଛନ୍ତି ।

ବାରିପଦା: ଅପରପକ୍ଷରେ ବାରିପଦା ସହରରେ ଦନ୍ତା ଆତଙ୍କ । ସହରର ମୁର୍ଗବାଡି ଅଞ୍ଚଳରେ ହାତୀ ବୁଲୁଥିବାର ଦେଖିବାକୁ ମିଳିଛି । ତେବେ କୌଣସି କ୍ଷୟକ୍ଷତି ଘଟାଇ ନଥିବା ବେଳେ ବାରିପଦା ବନ ବିଭାଗ ହାତୀର ଗତିବିଧି ଉପରେ ନଜର ରଖିଛନ୍ତି । ହାତୀ ଯେମିତି ଜନବସତୀ ଆଡକୁ ନଯିବ ସେଥିପାଇଁ ବାଣ ଫୁଟାଇ ହାତୀକୁ ଘଉଡାଇବାକୁ ଚେଷ୍ଟା କରୁଛନ୍ତି ବନ କର୍ମଚାରୀ । ଏବେ ହାତୀ ସଂଖାଭଙ୍ଗା ଅଞ୍ଚଳରେ ଥିବା ବନବିଭାଗ ପକ୍ଷରୁ ସୂଚନା ମିଳିଛି ।