କୋଭିଡ କଟକଣାରେ କରାଯିବ ପ୍ରାଥମିକ ଓ ମାଧ୍ୟମିକ ପିଲାଙ୍କ ନାମଲେଖା

ଭୁବନେଶ୍ୱର: ପ୍ରାଥମିକ ଓ ମାଧ୍ୟମିକ ପିଲାଙ୍କ ନାମଲେଖା ଆରମ୍ଭ ହେବ । ୨୦୨୧- ୨୨ବର୍ଷ ପାଇଁ ମେ’ ୩୧ସୁଦ୍ଧା ନାମଲେଖା କରାଯିବ । ଏଥିପାଇଁ SOP ଜାରି କରିଛି ଗଣଶିକ୍ଷା ବିଭାଗ । ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ଜିଲ୍ଲା ଶିକ୍ଷାଧିକାରୀ, ପ୍ରକଳ୍ପ ସଂଯୋଜକ ଏବଂ ବ୍ଲକ ଶିକ୍ଷାଧିକାରୀଙ୍କୁ ଚିଠି ଲେଖାଯାଇଛି । କୋଭିଡ ଭୟବହତା ଭିତରେ ନାମଲେଖା ପକ୍ରିୟା ଜାରି ରହିବ । କିନ୍ତୁ ଏସବୁ ପ୍ରକ୍ରିୟା କୋଭିଡ କଟକଣା ଭିତରେ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି ।

ଗଣଶିକ୍ଷା ବିଭାଗର ସୂଚନା ମୁତାବକ ସକାଳ ୭ଟାରୁ ୯ଟା ୩୦ପର୍ଯ୍ୟନ୍ତ ଚାଲିବ ନାମଲେଖା । ଏହି ସମୟରେ ଥରକେ ୫ରୁ ଅଧିକ ଅଭିଭାବକଙ୍କୁ ପ୍ରବେଶ ମନା ।
ନାମଲେଖାବେଳେ କରୋନା ଗାଇଡଲାଇନ ମାନିବାକୁ ହେବ । ମାସ୍କ ପିନ୍ଧିବା ସହ ସାମାଜିକ ଦୂରତା ରକ୍ଷା କରିବା ଏହି ସମୟରେ ବାଧ୍ୟତା ମୂଳକ ବୋଲି କୁହାଯାଇଛି ।

ସରକାରୀ/ ସରକାରୀ ସ୍ୱୀକୃତିପ୍ରାପ୍ତ ସ୍କୁଲ ପାଇଁ ନିର୍ଦ୍ଦେଶ ଲାଗୁ କରାଯାଇଛି । ଆଦର୍ଶ ବିଦ୍ୟାଳୟ, ମଦ୍ରାସାଗୁଡ଼ିକ ମଧ୍ୟ ନିର୍ଦ୍ଦେଶ ପାଳନ କରିବେ । ସେହିପରି BSE/CHSE ସହ ଅନୁବନ୍ଧିତ ଥିବା ସ୍କୁଲ ଏହି ନିର୍ଦ୍ଦେଶ ପାଳନ କରିବେ ବୋଲି ଗଣଶିକ୍ଷା ବିଭାଗ ପକ୍ଷରୁ କୁହାଯାଇଛି ।