ପରାଜୟ ଭୟରେ ହିଂସା ଆପଣାଉଛି ବିଜେପି

ଭଦ୍ରକ: ନିର୍ବାଚନ ପରେ ପରାଜୟର ଭୟ ଘାରିଛି ବିଜେପିକୁ ।  ରକ୍ତମୁଖା ହୋଇ ଉଠିଛନ୍ତି ବିଜେପିକର୍ମୀ । ଏମିତି ଅଭିଯୋଗ ଆସିଛି ଭଦ୍ରକ ଜିଲ୍ଲାର ଚାନ୍ଦବାଲି ବ୍ଲକର ଜାଗୁଳା ପଞ୍ଚାୟତରୁ । ଜାଗୁଳା ପଞ୍ଚାୟତରେ ଭୋଟ ସମୟରେ ଶାନ୍ତିପୂର୍ଣ୍ଣ ମତଦାନ ହୋଇଥିଲା । କିନ୍ତୁ ଅପରାହ୍ନରେ ଅଡାବନ୍ଧ ଗାଁ’ର ନାଳୁ ନାମକ ବ୍ୟକ୍ତିକୁ ମାଡ଼ ମାରିବା ସହିତ ଗାଡ଼ି ଭାଙ୍ଗିଥିଲେ ବିଜେପି କର୍ମୀ । ଏସମ୍ପର୍କରେ ନାଳୁ ବିଜେଡିକର୍ମୀଙ୍କୁ ଜଣାଇଥିଲେ । ଏହି ଘଟଣାରେ ସନ୍ଧ୍ୟାରେ ବିଚାର ହେବାକୁ ଥିବାବେଳେ ଧାମରା ଛକରେ ବିଜେଡି କର୍ମୀ ବୁଲୁଥିବା ସମୟରେ ଅତର୍କିତ ଆକ୍ରମଣ କରିଥିଲେ ବିଜେପି କର୍ମୀମାନେ । ଠେଙ୍ଗାରେ ପିଟି ଲହୁ ଲୁହାଣ କରିଦେଇଥିବା ଅଭିଯୋଗ ହୋଇଛି । ପୋଲିସ ଉପସ୍ଥିତ ଥିଲେ ବି  ନିରବ ଦ୍ରଷ୍ଟା ସାଜିଥିଲେ । କିଛି ସମୟ ଧରି ଧାମରା ଛକ ବିଜେପି କର୍ମୀମାନେ ରଣକ୍ଷେତ୍ର କରିଦେଇଥିଲେ । ଭୟରେ କେହି ଆସିନଥିଲେ । ରକ୍ତାକ୍ତ ଅବସ୍ଥାରେ କିଛି ଲୋକଙ୍କୁ ଚିକିତ୍ସା ପାଇଁ ଧାମରା ମେଡିକାଲରେ ଭର୍ତ୍ତି କରାଯାଇଥିଲା । ପ୍ରାଥମିକ ଚିକିତ୍ସା ପରେ ଭଦ୍ରକ ଡାକ୍ତରଖାନାର ସ୍ଥାନାନ୍ତରିତ କରାଯାଇଛି  ।