ମାଆର ଚିକିତ୍ସା ପାଇଁ ନେଇଥିବା ଟଙ୍କା ଦେଲାନି ପୁଅ, ଭାଇକୁ ମାରିଦେଲା
ଢେଙ୍କାନାଳ: ସ୍ନେହ, ମମତାର ବନ୍ଧନରେ ରକ୍ତର ଛିଟା । ମାଆ ପାଇଁ ଭାଇକୁ ହତ୍ୟା । ହତ୍ୟାର କାରଣ ମାଆଠାରୁ ପୁଅ ନେଇଥିବା ଟଙ୍କା । ବଡ଼ଭାଇର ଛୁରାମାଡ଼ରେ ସାନଭାଇର ମୃତ୍ୟୁ ହୋଇଛି । ଢେଙ୍କାନାଳ ଜିଲ୍ଲା ମୋଟଙ୍ଗା ଥାନା ଆରତୀ ଶଙ୍କରାକାଟେନି ଗାଁରେ ଘଟିଛି ବୀଭତ୍ସ ହତ୍ୟାକାଣ୍ଡ । ବଡ଼ଭାଇ ଦୁର୍ଜନ ନାୟକଙ୍କ ଛୁରାମାଡ଼ରେ ସାନଭାଇ ଶର୍ମା ନାୟକଙ୍କ ମୃତ୍ୟୁ ହୋଇଛି ।
ଘଟଣା କିଛି ଏମିତି, କିଛିଦିନ ତଳେ ମାଆ ବଡ଼ ପୁଅ ଦୁର୍ଜନକୁ ୨୦ ହଜାର ଟଙ୍କା ଦେଇଥିଲେ ଆକାଉଣ୍ଟରେ ରଖିବା ଲାଗି । ତେବେ, ମାଆ ଅସୁସ୍ଥ ହୋଇ ପଡ଼ିବାରୁ ଚିକିତ୍ସା ଲାଗି ବଡ଼ଭାଇକୁ ସେହି ଟଙ୍କାରୁ ୧୦ ହଜାର ଟଙ୍କା ମାଗିଥିଲା ସାନଭାଇ । ହେଲେ ଟଙ୍କା ଦେବାକୁ ମନା କରି ଦେଇଥିଲେ ଦୁର୍ଜନ ।
ଏହାକୁ ନେଇ ୨ ଭାଇଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ଆଉ ଶେଷରେ ଉତକ୍ଷିପ୍ତ ହୋଇ ବଡ଼ଭାଇ ଦୁର୍ଜନ ସାନଭାଇ ଶର୍ମାକୁ ଛୁରାମାଡ଼ କରିଥିଲା । ଶର୍ମାକୁ ଗୁରୁତର ଅବସ୍ଥାରେ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଡାକ୍ତର ମୃତ ଘୋଷଣା କରିଛନ୍ତି ।
