ଟ୍ରକ-କାର ଧକ୍କା: ଜଣେ ଶିଶୁ ସହ ଜୀବନ୍ତ ଜଳିଗଲେ ୮

ବରେଲି: ଉତ୍ତରପ୍ରଦେଶର ବରେଲି-ନୈନିତାଲ ହାଇୱେରେ ମର୍ମନ୍ତୁଦ ସଡ଼କ ଦୁର୍ଘଟଣା । ଭୋଜିପୁରା ନିକଟରେ ଜୀବନ୍ତ ଜଳିଗଲେ ୮ ଜଣ ଯାତ୍ରୀ । ଟ୍ରକ ସହ କାରର ଧକ୍କା ହେବା ପରେ ଏକ ଶିଶୁ ସମେତ କାରରେ ଥିବା ୮ ଜଣ  ଯାତ୍ରୀ ପୋଡ଼ି ହୋଇ ମୃତ ।

ବିବାହ କାର୍ଯ୍ୟକ୍ରମ ସାରି ଫେରୁଥିବାବେଳେ ଦୁର୍ଘଟଣା ଘଟିଛି । ଗତକାଲି ରାତିରେ ବିବାହ କାର୍ଯ୍ୟକ୍ରମରୁ ଫେରୁଥିବାବେଳେ କାରର ଗୋଟିଏ ଟାୟାର ଫାଟି ଯାଇଥିଲା । ଏହାପରେ କାଟି ଟ୍ରକକୁ ଧକ୍କା ଦେଇ ରାସ୍ତାର ଅନ୍ୟ ଲେନକୁ ଚାଲିଯାଇଥିଲା । ସେଠାରେ ଅନ୍ୟ ଏକ କାର ସହ କାରର ଧକ୍କା ହୋଇଥିଲା । ଦୁର୍ଘଟଣା ପରେ କାରରେ ନିଆଁ ଲାଗିଯାଇଥିଲା ।

ସେଣ୍ଟ୍ରାଲ ଲକ୍ ବ୍ୟବସ୍ଥା ଥିବା କାର ଆଉ ଖୋଲିନଥିଲା । ଘଟଣାସ୍ଥଳରେ ଅଗ୍ନିଶମ ବାହିନୀ ସହ ପୋଲିସ ଟିମ ପହଞ୍ଚି ନିଆଁକୁ ଆୟତ୍ତ କରିଥିଲେ । ମୃତଦେହ ବ୍ୟବଚ୍ଛେଦ କରାଇବାକୁ ମେଡିକାଲ ପଠାଯାଇଛି । ମୃତକଙ୍କ ପରିବାର ଲୋକଙ୍କୁ ଜଣାଇବା ସହ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।