ଟିଏମସି ନେତା ଶେଖ ଶାହାଜାହାନଙ୍କ ଘରେ ପୁଣି ଥରେ ଇଡିର ରେଡ୍

ପଶ୍ଚିମବଙ୍ଗ: ପଶ୍ଚିମବଙ୍ଗର ଇଡି ଟିମ୍ ଉପରେ ଆକ୍ରମଣ ମାମଲାରେ ଟିଏମସି ନେତାଙ୍କ ଘରେ ପୁଣି ଥରେ ଇଡିର ରେଡ୍। ଟିଏମସି ନେତା ଶେଖ ଶାହାଜାହାନଙ୍କ ଘରେ ପୋଲିସ ଓ ବିଏସଏଫ ଜବାନଙ୍କ କଡା ସୁରକ୍ଷା ମଧ୍ୟରେ ଇଡି ଚଢାଉ କରିଛି।  କୁହାଯାଉଛି ଯେ, ଇଡି ଶାହାଜାହାନଙ୍କ ଘରର ତାଲା ଭାଙ୍ଗି ଭିତରେ ପ୍ରବେଶ କରିଛି । ଇଡି ଟିମ୍ ଉପରେ ଆକ୍ରମଣ ମାମଲାରେ ଶେଖ ଶାହାଜାହାନ ହେଉଛନ୍ତି ମୁଖ୍ୟ ଅଭିଯୁକ୍ତ।

ସୂଚନା ଅନୁଯାୟୀ, ରାଶନ ଦୁର୍ନୀତି ମାମଲାରେ ଶେଖ ଶାହାଜାହାନ ୧୯ ଦିନ ହେବ ଫେରାର୍ ଅଛନ୍ତି । ଇଡି ତାର ପୁରା ଟିମ୍ ସହ ଆସି ଶାହାଜାନଙ୍କ ଘରେ ଛାପା ମାରିଛି । ଏହି ସମସୟରେ ୧୨୫ ସେଣ୍ଟ୍ରାଲ ଫୋର୍ସ କର୍ମଚାରୀ ଏବଂ ୩୫ ରାଜ୍ୟ ପୋଲିସ କର୍ମଚାରୀଙ୍କୁ ଘଟଣାସ୍ଥଳରେ ନିୟୋଜିତ ଅଛନ୍ତି। ଆଠ ଜଣ ଇଡି ଅଧିକାରୀ ଶେଖ ଶାହାଜାହାନଙ୍କ ଘରେ ଖୋଜାଖୋଜି କରୁଛନ୍ତି।

ଇଡି ଅଧିକାରୀଙ୍କ ଉପରେ ଆକ୍ରମଣ ଅଭିଯୋଗରେ କୋଲକାତା ଉଚ୍ଚ ନ୍ୟାୟାଳୟ ଦ୍ୱାରସ୍ଥ ହେବା ପରେ ହାଇ କୋର୍ଟ TMC ଦଳ ନେତା ଶେଖ୍ ଶାହାଜାହାନଙ୍କୁ ଗିରଫ କରିବା ପାଇଁ ନିର୍ଦ୍ଦେଶ ଦେଇଥିଲେ। ଏହି ଘଟଣା ପରେ ଇଡି ଦୁଇଟି ଏଫଆଇଆର୍ ପଞ୍ଜୀକୃତ କରି ସିବିଆଇ ତଦନ୍ତ ଦାବି କରିଛି। ଉଭୟ ମାମଲାରେ ଏସଆଇଟି ଗଠନ ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି।

ଇଡି ଅଧିକାରୀଙ୍କ ଉପରେ ଆକ୍ରମଣ ଅଭିଯୋଗରେ ଟିଏମସି ନେତା ଶାହାଜାହାନ ଶେଖଙ୍କୁ ଗିରଫ ନକରିବା ନେଇ ପଶ୍ଚିମବଙ୍ଗ ରାଜ୍ୟପାଳ ସିବି ଆନନ୍ଦ ବୋଷ ଅସନ୍ତୋଷ ବ୍ୟକ୍ତ କରିଛନ୍ତି। ଶେଖଙ୍କୁ ଗିରଫ ନକରିବା ନେଇ ରାଜ୍ୟପାଳ ମମତା ସରକାରଙ୍କୁ ପ୍ରଶ୍ନ ପଚାରିଥିଲେ। ବୋଷ ପ୍ରଶ୍ନ କରିଛନ୍ତି ଯେ, ଶେଖ ଶାହାଜାହାନଙ୍କୁ ଏପର୍ଯ୍ୟନ୍ତ କାହିଁକି ଗିରଫ କରାଯାଇ ନାହିଁ?

ସୂଚନା ଅନୁଯାୟୀ, ରାସନ ସ୍କାମ ମାମଲାରେ ଶେଖ ଶାହାଜାହାନଙ୍କ ଘରକୁ ଇଡି ଚଢାଉ କରିବାକୁ ଆସିଥିଲେ। କିନ୍ତୁ ସେଠାରେ ଶେଖ ଫେରାର ଥିବା ବେଳେ ଗ୍ରାମବାସୀ ଇଡିକୁ ବିରୋଧ କରିଥିଲେ। ଏହାପରେ ୩ ଜଣ ଇଡି ଅଧିକାରୀଙ୍କୁ ମାଡମାରି ରକ୍ତାକ୍ତ କରିଥିଲେ ଗ୍ରାମବାସୀ। ଏହି ଘଟଣା ପରେ ତିନି ଜଣ ଇଡି ଅଧିକାରୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା।\