ଫେରିଲା ନ୍ୟାସନାଲ ହେରାଲ୍ଡ ମାମଲା, ରାହୁଲ ଓ ସୋନିଆ ଗାନ୍ଧିଙ୍କୁ ଇଡିର ସମନ

ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ଓ ରାହୁଲ ଗାନ୍ଧିଙ୍କୁ ଇଡିର ସମନ । ନ୍ୟାସନାଲ ହେରାଲ୍ଡ ମାମଲାରେ ରାହୁଲଙ୍କ ସମନ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଜୁନ ୨ରେ ଇଡିରେ ହାଜର ହେବାକୁ ରାହୁଲଙ୍କୁ ସମନ ପଠାଯାଇଥିବା ବେଳେ ସୋନିଆଙ୍କୁ ୮ ଜୁନରେ ହାଜର ହେବାକୁ ନୋଟିସ କରାଯାଇଛି । ତେବେ ED, ସିବିଆଇ ଆଦି ଜାତୀୟ ସଂସ୍ଥାକୁ କେନ୍ଦ୍ର ସରକାର ଅପବ୍ୟବହାର କରୁଛି ବୋଲି କହିଛି କଂଗ୍ରେସ ।

କଂଗ୍ରେସ ନେତା ଅଭିଷେକ ମନୁ ସିଂଘଭୀ ଓ ରଣଦୀପ ସୂର୍ଯ୍ୟୋଓ୍ୱାଲା ସାମ୍ବାଦିକ ସମ୍ମିଳନୀ କରି ଏହି ଦାବି କରିଛନ୍ତି । ଅଭିଷେକ ମନୁ ସଂଘଭୀ କହିଛନ୍ତି ଯେ ଇଡିଙ୍କ ପଚରାଉଚରା ପାଇଁ ସୋନିଆ ଗାନ୍ଧି ନିଶ୍ଚିତ ଯିବେ । କିନ୍ତୁ ରାହୁଲ ଏବେ ବିଦେଶ ଗସ୍ତରେ ଥିବାରୁ ତାଙ୍କର ଇଡିର ହାଜିରା ନେଇ କଂଗ୍ରେସ ନେତା କିଛି ସ୍ପଷ୍ଟ ଭାବରେ କହିନାହାନ୍ତି । ଯଦି ରାହୁଲ ଜୁନ୍ ୮ ପୂର୍ବରୁ ବିଦେଶ ଗସ୍ତରୁ ଫେରି ଆସିଥିବେ ତେବେ ସେ ନିଶ୍ଚିତ ଭାବରେ ଇଡିରେ ହାଜର ହେବେ ବୋଲି ସିଂଘଭୀ କହିଛନ୍ତି । ନଚେତ ଏଥିଲାଗି ଅଧିକ ସମୟ ମଗାଯିବ ବୋଲି ସେ କହିଛନ୍ତି ।